Politics hriatthiam harsa lai

BJP national spokesperson (i/c Mizoram) Mmhonlumo Kikon chuan, kum 2018-a Mizoram Assembly inthlanpuiah MNF-te chu BJP puihna avanga sorkar thei an nih thu tun hnai khan Aizawl Press Club-ah a sawi a, "MNF-te nen hian kan thawkho ṭha a, kum 2018 inthlanah pawh BJP puihna avangin sorkarna an chang a ni. Tu pawh zawt ila, 'MNF-te hi BJP puihna avangin sorkar an ni lo,' an ti thei lo ang," a ti a; Mizoram MP-te chu Parliament-ah ruling ṭhutnaah ṭhuttir an nih thu sawiin, "BJP-in Mizorama MLA kan neih ve chhun pawh ruling lama ṭhuttir ve turin kan duh. A tìr aṭangin ruling lamah ṭhuttir ve turin kan nawr a, mahse, a la hlawhtling thei lo. Kan MLA hi ruling lama a ṭhut theihna atan kan nawr chhunzawm zel ang," a ti. 

Mizorama rorelna vawnfung chelhtu MNF hian kum 2018 inthlana an tlin chhan kha, 'BJP puihna vang' tih hi an pawm nge pawm lo hriat a ni lo a; nimahsela ram pum huapa BJP thupuangtu chuan MNF chu BJP vanga Mizorama sorkarna siam thei an nih thu a sawi mauh mai. India ram hmun danga interview-naa a sawi pawh ni lo, Mizoram khawpuia media hmaa MNF sorkar chhan chu BJP puihna tih thu a sawi hian sawi zui a hlawh hle. 

MNF hi BJP hnuaiah NDA leh NEDA-ah an awm tih chu ram pumin a hria a, chutihlaiin  MNF lam hi chuan 'BJP partner' anga insawi hi chu an hreh hle niin a lang. Mizoram chhungah hian BJP an thawhpui thu hi MNF lam aṭang hi chuan a la ri chhuak meuh lo. Hetihlai hian BJP nena thawk dun, BJP lama ṭang an tih thu leh an sorkar chhan pawh BJP puihna a nihzia hi BJP thupuangtu chuan a rawn sawi ve ta thung a ni. 

Kum 2018 inthlan dawnah khan eng ang chiahin nge an lo inṭanpui a, MNF-in BJP hnen aṭanga sum leh pai leh thil dang hmanga ṭanpuina an dawn dante pawh hriat chian a chakawm a; hetianga a BJP thupuangtu berin Aizawl khawpui a, 'Kum 2018-ah BJP puihna avangin MNF-in sorkarna an siam' a rawn ti ta lung lung mai hi chu politics-a thil hriatthiam harsa lai, hriat chian chakawm lai ni bawk si a ni awm e.