Kut tling loa sum lak

Chief minister Lal Thanhawla chuan, tun hnaiah Look East Policy tihhlawhtlin nan Sittwe chhuahká chak taka buatsaihna atan sorkarin Myanmar sorkar chu ṭanpuina sum a pe tih sawiin, "Kut tling loa sum lak pawisa loin Mizoram chinah heng hna hi an tiṭhuanawpin an tisukuk a ni," a ti a; kut tling loa sum lâk hreh lote avangin Bairabi-Sairang rel kawng sial mek pawh a hun taka peih loh a hlauhthawnawm thu a sawi.

Kut tling loa sum lakluh tia chief minister-in a sawi ber hi compensation dik lo niin a lang a, hei hi sawi a tam tawh a, inhrem leh a dik lo hai chhuah erawh a awm meuh lo. Mihring pangngai ni ve si, dawt phuahchawp ringawta ram nei anga inchhal a, thuneitu lama ram awm lo siam chawp a, a tam thei ang zangnadawmna lak tum mihring kan nei tam hi a vanduaithlak hle a ni.

Tun hnaia rel kawngin a paltlang tur ramah hian heng khua leh a chhehvel mite ni lo, khawpuia officer leh mi hausa deuhin ram an nei fur a, thil mak tak a ni. Mi ṭhenkhat hi chuan huan leh lo an nei a, a ṭhente erawh hi chuan kham pang leh hmun rem lo deuhte hi 'dan angin' an lo nei fel thlap a, zangnadawmna sum tam tak an dawng a, heng mite hian zah nachang an hriat a hun ta.

Myanmar lama kal tlang tur kawngpui lian sial pawh zang-nadawmna phut-tute avangin hna a khaihlak mek. Heng zingah hian a ram neitu dik tak an awm ngei ang a; nimahsela a ram zau zawng leh ram neia inchhal tam dana en hi chuan thil dik lo a inphum ngei ang tih a rin theih.

Kut tling loa sum lakluh hi tawngpawng inkhap theih a ni lo a; nimahsela kut tling loa sum lakluh awlsamna ram nih loh tum ila, kut tling loa sum lakluh a hlauhawmna ramah insiam tum ila, chutiang ti theitu chu sorkar hi a ni e.