CSC-te vil uluk a ṭul

Lungleia police-te chuan Lunglei district chhung, Marpara South-a birth certificate lem siam ṭhin Chakma pakhat June 22, 2024 khan an man a, June 25 khan jail-ah dah luh a ni.

Lunglei District Research Officer-in FIR-a a tarlan dan chuan, birth certificate lam siam ṭhin an man chu CSC tia hriat lar, common service centre nei a ni a, birth cerficate pakhat Rs 3,500-in a hralh ṭhin. Birth certificate lem engzat nge a siam hman tih hriat a ni mai lo a, Bangladesh aṭanga rawn lut Chakma-te a lo siamsak tam viau tawh mai thei. Hetianga dan loa thil ti ṭhin man chhuah a ni hi a lawmawm.

CSC aṭang hian lehkha (document) pawimawh hrang hrangte bawrhsap pisa vela kal ngai loin siam theih a ni a, sorkar aiawh leh officer pawimawh tak takte aiawh an nihna lai a awm a, an fimkhur hle a ngai. CSC enkawl mekte hi fuih thar theih ni se, tih tur leh tih loh turte inhriattir thar theih ni se a ṭha ngawt ang.

CSC hi thil dik lo leh thil sual ti duhte tan tih theihna a ni a, chuvangin an rinawm a ṭul. Sorkar thuneitute pawhin an vil ṭhat a, document an pek chhuahte pawh a en zui ṭhat a ṭul âwm e. CSC neitu/enkawltu tur thlanah pawh a fimkhur a ṭul. A theih chin chinah CSC enkawltu tur chu mi rintlak a nih leh nih loh chhui chiante pawh a ṭul ang.

Tun hma aṭang tawhin Bangladesh aṭangin Chakma foreigner an rawn lut nasaa sawi a ni ṭhin a; Mizorama Chakma pun chak dan hi a awm sate inthlan chhâwnna aṭanga punna ringawt a ni thei loa ngai mi tam tak an awm. Mahni hnampuite duhsakna leh Mizorama Chakma te pun tumna rilru nen, dan loa birth certificate lem siam leh thil pawimawh dangte insiamsak hi a hluar viau mai thei.

Chakma-te chauh chenna khaw tam tak a awm a, chu'ngah chuan CSC an awm nualin a rinawm. Chakma khuaa CSC aṭangte chuan birth certificate leh document dang lem an lo siam ve ṭhin ang em? CSC-te hi sorkar thuneitute'n ṭha taka an vil a ngai a, Chakma khuaa CSC-te phei chu vil uluk lehzual bakah enfiah a ṭul ang.