Khung hran lai duty tír an awm em ni?

Mizoram sorkarin tun hnai­ah Assembly House kawtah Bihar inthlana duty zo rawn haw police, home quarantine laite a duty tir niin ZMP Ṭhalai chuan an tarlang a, "A ṭhen phei chu swab sample test result nghak mekte an ni," an ti. 

Bihar-a election duty tura kal Mizoram police zingah mi eng emaw zat chu Covid-19 positive-in an rawn haw a, positive ni ve lote pawh khung hran an ni hlawm. Mizoram sorkarin Covid-19 chungchangah ruahmanna fel tak a siam a, state pawn aṭanga lo kirte khung hran hun chhung turte leh swab sample lak hnua an awm dan turte pawh chiang takin ziakin a dah vek a ni. 

Heti chunga kan police ṭhen­khat home quarantine laite sorkarin a duty-tir a nih tak tak chuan thil serious tak a ni. He thil hi politics-a inpuhna mai a ni palh thei a, inpuhna mai mai a nih loh erawh chuan Aizawl DC pawhin a chhui chiang ngei tur a ni a, Chief Secretary pawhin a enzui tur chi a ni ngei ang. 

Hripui a darh zel lohna turin ruahmanna hrang hrang siam a ni a, mi tam tak eizawnna tichhe khawpin kan in khuahkhirhin kan in kharkhip a, mirethei tam tak chu a rûmin an rûm a; amaherawhchu heng zawng zawng hi mipui tam zawk himna tura ruahmanna a nih avangin sorkar demna tur chi a ni lo ang. Sorkarin mi tam berte himna leh ṭhat zawkna tur a ngaihtuah a, chumi avang chuan Covid-19 in­kaihhruaina hi a siam a, mi tam takin an retheih phah tih chu phat rual a ni lo.

Hetihlaia sorkar ngeiin a dan siam a palzut a, home qua­rantine lai a duty tir a nih tak tak chuan thupetute hi dan anga hrem an ni tur a ni. Hei hi sorkarna vawnfung chelh mektu MNF beihnaah ngaih tur a ni lo a, sorkar official zingah sorkar inkaihhruaina bawhchhia an awm a nih chuan 'dan ngaih­pawimawh' vang tal pawhin bawhzui ngei chi a ni. Duty zing­ah swab sample test result nghak mek an awm a nih phei chuan thil serious tak a ni a, ngawih bopui mai chi a ni lo ang.