Sum siamna industry lem?

Industrial Growth Centre, Luangmuala M/s Mizo Carbon Product chu nimin khan mi ṭhahnemngaiten an tlawh a, industry hi kum eng emaw zat a kal mumal tawh loa an hriat thu leh Central subsidy dilpui chi-a an ngaih loh thu an sawi. An khawlte chu a tuiêk bakah, hnathawktu pawh an awm lo.

He industry atan hian Central Capital Investment Subsidies (CCIS) leh Central Transport Subsidy (CTS) eng emaw zat pek an ni a; January 1, 2013 aṭanga September 30, 2014 inkar chhungin CCIS atan cheng nuai 93.90 leh raw material phurhna ṭanpuina CTS atan cheng vbc. 2.47 dilna District Industries Centre, Aizawlah an thehlut a; dilna hi SLC chuan ngaihtuahin, an dil zat angin sorkar laipuiah an dilpui a ni.

He thil hi ngun taka chhui zui chi a ni a, Mizoram sorkar hnuaia state level committee (SLC)-in sum a lo dilpui mai pawh hi a chhan hriat chian a chakawm khawp mai. Tun hma aṭang tawhin Mizoramah hian central subsidy hmanga intilian an awm ṭhin a, an hnathawh hmuh tur awm tak tak si lo, industry lian tak din anga inchhala central subsidy la ṭhin an awm. Tun thlenga hetiang thil a la awm hi a vanduaithlak a, M/s Mizo Carbon Product kalphung hi enthlak zui zel a ṭha khawp mai.

Mizoram sorkar pawhin thil a taka titute leh a lem hi an thliar thiam tur a ni a, Zuangtuia industrial estate a dinte pawh hunah hian residential area ang maiin chenna in a ding khat deuh vek tawh. Tuna Lengte leh Luangmuala hmun a neihte pawh hi tute hnenah nge an pek a, hnathawktu tak tak an ni nge ni lo tih hi ennawn leh a ṭha khawp mai.

Mizoram sorkar pawhin industry lem siama sum lakluh tumna lamah hian beng chhi deuh se, thuneitu lam hi a man ṭang eituah an tel ve anga puh awlsam tur khawpin hetiang titute hi zuah tawh suh se. Industry lem hmanga sum siam ṭhin an awm a, an la awm belh zel niin a lang a, hei hi tihtawp a hun ta.