Duhsakna

Chief minister Lal Thanhawla chuan, sorkar laipuia BJP kaih-hruai National Democratic Alliance (NDA) chuan Mizoram sorkar chu a duhsak hle tih a sawi a; Mizoram sorkar chu hna a thawh ṭhat avanga sorkar laipui duhsakna dawng niin a sawi.

Chief minister berin sorkar laipui duhsakna kan dawn thu a sawi a, "Min duhsak lo," tia hnial chi a ni lo ang a, min duhsak nia a sawi chhan hi hnathawh ṭhat vang a nih leh nih loh erawh thlir dan a dang thei ang. Mizoram sorkar hian hna a thawk ṭha tak tak nge tak tak lo, tih hretu chu mipuite kan ni a, sorkar laipui mithmuha duhsak tlak khawpa an lo thawk a nih chuan a lawmawm ang. Sorkar laipui hian state-a sorkarna chelhtu chu eng party pawh ni se, hnathawk ṭha an nih phawt chuan ṭa takin an thawhpuiin an pui ṭha niin chief minister hian a sawi a, Mizoramah pawh hei hi kalpui ve theih ni se a lawmawm khawp mai. MLA-a opposition bial chu an ro deuh bik a, hmasawnna hna a kal muang ṭhin a, hemi kawngah hian Mizoram sorkar hian sorkar laipui hi entawn se a ṭha ang.

Duhsak tlaka hnathawh hi thil awm thei chu a ni ngei a, state sorkar hnathawk ṭha na na na chu sorkar laipui tan pawh
ṭanpui an nuam ang a, thawhpui loh theih loh khawpa hnathawk ṭhate pawh an awm thei ang. Mizoram sorkar kalphung en hian, duhsak tlak khawpa hnathawk ṭha an nih chuan a lawmawm a; nimahsela a chhunga cheng mipuite hmuh danah hian eng ang taka hnathawk ṭha nge an nih tih hi teh thiam a harsa khawp ang.

NLUP dawng tur thlan danah, sorkar aṭanga contract leh supply dawngtu tur thlan dan leh sorkar-a hna awm ang ang thawktu tur thlan danah hian political party lam hi tehfungah hman a ni nge ni lo, tih hi zawhna awm thei a ni a. Sorkar laipui chuan party thliar loin state sorkar a pui a, hnathawk
ṭhate hnenah duhsakna a lantir
ṭhin a nih chuan, Mizoram sorkar pawh hian 'duhsakna' a lantir dan hi political party zawngin thliar bik lo se a ṭha hle.