Dan rorelna leh MLA
Phaizau VC leh an khuaa pawl dang zawng zawng (all NGO)-te telna joint committee chuan, an bialtu MLA H Lalzirliana leh, an khua leh Mamita MNF hruaitute'n Tut luiah bomb hmangin sangha an man tih an tarlang a; dan an bawhchhiat avangin Phaizaua MNF unit hruaitute chu Rs. 10,000 cháwi turin an hriattir.
Hetiang thila inpuhna a awm tawh hi chuan a lehlam pawl hian insawifiahna an nei vat ṭhin a, pawn lam aṭangin thudik hriat theih ni tawh ṭhin lo mah se bomb hmanga sangha mana 'puh tur' khawpa kan ram hruaitute an awm mai hi an inhmeh lo hle.
Tun hnaiah dan ngaih pawimawh thu kan MLA-te aṭang ngeiin a ri chhuak nasa a, MLA aṭanga an MLA pui ban tura an hek chhan pawh 'dan ngaih pawimawh' vang niin an sawi a, ruling MLA hming lanna hi dan mit aṭanga thlir chuan chhui zui ngei chi a nih hmel.
Social media lamah an sangha mante thlengin a darh a, mi pangngai pawhin han en mai chuan sangha khati zozai mai kha man dan pangngaia man chu a ang lo khawp mai a; insawifiahtu lamin sawi tur an lo nei a nih pawhin lui humhalh lai ni loah chuan sangha khati zozai kha bomb hmang loa man chu thil harsa tak a nih hmel. Pawn lam aṭang chuan thudik hriat theih a ni tawh lo a, dan ngaih pawimawhna rama cheng kan nih angin enzui theih ni se a ṭha hle.
Engpawhnise tunah chuan 'dan' pawimawhzia hi kan ramah kan sawi chho zui zel dawn a nih hmel a, cheng maktaduai chuang awmna contract leh supply hna sem danah dan anga kalpui a nih leh nih loh te, an hnathawh vil zui dan leh a kal zel danah dan a lal nge lal lo tihte pawh enfiah zel a ṭha ang. Tute emaw beihna ang deuha dan hman a, tute emaw humna tur ang deuha dan bawk kan hmang leh a nih chuan ram rorelna a kal dik thei lo ang tih a hlauhawm hle.
Tun hnaia kan MLA pakhat an puhna hi thil dik lo hulhual a lo ni thei a, chutihlaiin khawtlangin huaisen taka thu an chhuah ngam danah thil dik ngei pawh chu a lo ni thei. Hei vang hian dan anga chhui chian a, dan bawhchhia an awm a nih chuan dan anga hremna lekkawh hi dan ngai pawimawhtu sorkar tih tur a ni ngei ang.