Remna leh muanna vawn nun

India sorkar leh MNF-te'n inremna an ziah champha Remna Ni, June 30 chu kan lo thleng leh dawn ta. Remna Ni a thlen hian rualú zawkte chuan rambuai laia harsatna an tawh rapthlâkzia leh inremna a awm avanga an lawmzia an hre chhuak fo ṭhinin a rinawm.

Hun eng emawti lai khan Remna Ni hi political party-te inhnialna ní a ni ṭhin a, Remna Ni hman ṭhat duh loh hun laite pawh a lo awm tawh ṭhin. Kha'ngte kha thil ngaihtuah chian tâwk loh vang te, remna hlutzia pawh tâwk loh vang te, party politics lâk ulh lutuk vangte a ni mai thei. Khatiang kha tunah chuan a awm tawh rih lo niin a lang a, a lawmawm. Remna Ni-ah hian tute emaw langsar bik an awm a nih pawhin, thîk mai loin, pawm thiam a ṭha.

Mizoramin 'rambuai' vanga hun khirh tak a tawh kara inremna a awm theihna tura theihtawp chhuahtute an fakawm. Ṭhenkhat chu langsar tak leh mipui nâwlpui hriat theiha hma late an ni a, ṭhenkhat chu miin an hriat vak loha ṭan lo la ve ngar ngarte an ni ang; an zavaiin an fakawm em em vek mai. India rama state ralmuang ber kan nih theihna tura thawktute vek an ni.

Mizoram hi 'rambuai' a nih chhan te, thil kal zel dante leh inremna ziah a nih dan te, a hnu zela Mizoram awm danahte hian mi dem leh sawisel tur te, mi fak leh chawimawi turte pawh kan hria a ni thei. Sawi chhuah a ṭhatna a awm theih rualin, ṭhatna leh sâwtna awm miah lo a ni thei bawk a; insûm thiam leh a hun leh hmun thliar thiam a ṭul awm e.

Mimal inkarah te, chhungkua leh khawtlangah te, ram pumah leh ram leh ram inkarahte inremna lohna leh innghirnghona a awm chuan a nuam lo chauh ni loin a hrehawm ṭhin. Tunah pawh ram ṭhenkhatah chuan an indo mek a, mi tam tak an thih phah tawh a, mi tam tak chu thih hlauhthawnawmah an awm bawk a, an nun a hrehawm em em. Chutiang chu kan nih ve tawh lohna turin, kan rama remna leh muanna awm mek hi a vawng nungtu, humhimtu leh tichaktu nih i tum ṭheuh ang u.