Loan pek chhuah leh rulh

Sorkar sum kum liam ta 2023-24 chhung khan Apex Bank chuan deposit cheng nuai 1,50,757.54 an hmu a, loan cheng nuai 1,17,212.84 an pe chhuak thung a, deposit aṭanga loan an pek chhuah, credit-deposit (CD) ratio chu 77.75% a ni.

Mizorama bank zingah Apex Bank CD ratio hi a sang fála sawi a ni a, chutih laiin, bank ṭhenkhat chuan loan an pe chhuak tlem a, CD ratio 50% tling lo an awm nual bakah, CD ratio-a tlin ngai zat tlin lo an awm nuala sawi a ni.

Bank-te'n sum an hmuh (deposit) aṭanga loan pek chhuah zat tur leh CD ratio tlin tur zat target a awma sawi a ni. CD ratio target tlin ngai lo bank-te hian harsatna eng emaw tak an nei a ni thei a, an ti duh lo lui a ni thei bawk.

Bank ṭhenkhat chuan loan an pe chhuak ṭha duh lo hrim hrima sawi a ni a, hei hi a dik a nih chuan an ti dik lo hle a ni ang. Bank ṭhenkhat chuan Mizoram mipui hi sum hmuhna atan leh an hlâwkna atan chauh an duh a, mipui tana bank aṭanga hamṭhatna awm tur leh mipuiin bank an chhawr ṭangkaina turah chhawr ṭangkai theihin an awm duh lo luia sawite pawh a awm. Hetiang hi a ni tak tak a nih chuan, chutiang bank-te chu an inenfiah a ngai ang a, sorkar lama thuneitute'n an en zui deuh a ṭulin a rinawm.

Bank ṭhenkhat chuan harsatna an nei a ni ve thei bawk a. Loan late zinga rùl ṭha duh lo leh rulh hun tiam chhunga rùl thei lo an tam a ni thei a, chu'ngte chuan harsatna a thlen a ni thei. Loan lâk leh loan rulh chungchangah Mizo zinga mi tam tak chu an inenfiah a ṭul a ni thei a; harsatna lian bik tak nei ni si lo, ngaihthah vang leh tum tâwk loh hrim hrim vanga loan rùl ṭha duh lote pawh an awm thei ang.

Loan pek chhuah kawngah bank-te an inhawn lehzual theih nan leh Mizo mipui nâwlpuiin bank-te an chhawr ṭankai lehzual theih nan bank aṭanga loan late'n a rulh leh lam an ngaih pawimawh lehzual a ngai a ni.