Kudam leh kuhva tawlh rûk

Mizoram sorkara thuneitute'n tun hnaiah Vairengte chhehvel leh Buhchangphai velah kudam 71 an enfiah a, kudam 20-ah Myanmar aṭanga dan loa lak luh nia rin kuhva rah ip 9,635 a awm tih an hmu chhuak. Kudama kuhvate chu khawih che lo turin a neitute an hriattir nia sawi a ni.

Kolasib district chhunga kudam eng emaw zatah ram dang aṭanga dan loa kuhva rah lâk luhte dah khawm a nih thu sawi a lo awm tawh ṭhin a; chu'ng kudamte chu enfiah a, dan anga hma la tura sorkar thuneitute phûtna thâwmte pawh a lo awm tawh ṭhin.

Kudam eng emaw zata kuhva rah dah khawmte chu dan loa ram dang aṭanga lak luh a nih ngei a rinawm a; mi tam tak rinhlelh sa a ni. Dan loa kuhva tawlh rûk ngei a nih chuan sorkarin chak taka a bawhzui a, dan ang taka tihrîral a ṭul ang.

Kum eng emaw ti kal ta aṭanga ram dang aṭanga kuhva rah lâk luhte chu dan loa sumdawnna (smuggling) a nih avangin mi tam takin an vei a, sorkar leh Central YMA mai bakah, mimal ṭhahnemngaite'n tihtawp tumin hma a lo la tawh ṭhin. Chu'ng hmalaknate chuan awmzia nei ve bawk mah se, tun thlengin kuhva tawlh rûk tihtawp a la ni lo.

Dan loa kuhva tawlh rûk titawp tura sorkarin hma a la ṭhin chunga tihtawp a ni mai thei lo hian ngaihtuah a tithui viau. Sorkar hian tih tak takna a la nei tâwk lo a ni thei a, hma a lak tawhnate a la tâwk zo lo a ni thei a; chuvangin, nasa lehzuala sorkarin ṭan a lâk a ṭul.

Sorkar hmanrua ber sorkar hnathawkte, a bikin force lam mite zingah kuhva tawlh rutute thawhpui ṭhin an lo awm ru reng pawh a ni palh thei a, uluk lehzuala enfiah a, invil ngawrh lehzual a ṭul ang.

Ram dang aṭanga phalna nei loa kuhva lak luh leh sumdawnna atana hman hi dan bawhchhiatna a nih miau avangin sorkarin nasa lehzuala ṭan a lak a, hma a lak a ngai a ni ber e.