Lunglei, RT-PCR khawl leh Lunglei mipui

Congress Legislature Party (CLP) leader Zodintluanga Ralte-in a pek Civil Hospital, Lungleia hman tur swab sample endikna, RT-PCR khawl dahna tur peih vat turin Lunglei District Congress Committee (LDCC) chuan Mizoram sorkar an phût. 

CLP leader hian RT-PCR khawl a lei thar hi June-ah khan district bawrhsap hnenah a hlàn tawh a, tun thlenga hman loha a la awm a nih chuan a zia lo hle a ni. He khawl hi a leitu leina rilru hriat a ni lo a, politics lama eptu pawl lam lei a nih vang hrim hrima hman loha dah a nih chuan kan ram hruaitute hian ram leh a mipui aiin party politics an tuipui zawk tia puh loh theih loh a ni ang.

Chutih rualin he khawl hi a tirah Lunglei tana pek ni mah se a petu lam pawh hian Lungleiah khawl hman theihna laboratory a awm lo tih chu an hre lawk ngei ang a, hman theih lohna hmuna khawl ṭha tak pek hian awmzia a nei thui vak lo tih pawh a takin kan tawng mek. RT-PCR khawl hmang tur hian mamawh dang thil eng emaw zat a nei a, hei hi Lungleiah hian tun thlengin Mizoram sorkar hian a la bun thei lo tihna a ni. 

Mizoram sorkarin Lunglei mipuite tana ṭangkai tak tur RT-PCR khawl hman theih loha a dah reng erawh a zialo hle mai a, a khawl ber a awm tawh chuan laboratory din zuia buaipui zui hi thil theih loh a ni hauh lo ang. Sorkar tan insen belhna tur awm bawk mah se, thil dangah pawh pawisa hi ren lem loin an hmang reng tho a, mipuite tana ṭangkai tur RT-PCR khawl bunna tur laboraroty siam thei lo sorkar neih hi Lunglei mipui tan thil lawmawm a ni lo ang. 

December a ni tawh a, sorkar hian Lungleia RT-PCR khawl hman theihna siam hi a tum tak tak a nih chuan tunah hian hman a hun tawh a, kan sorkarin Lunglei mipui hriselna a ngai pawimawh tawk lo nge, RT-PCR khawl hman loha a dah reng chhan hi sawifiah se a ṭha awm e.