Gas khawih chingpen

Central YMA chuan kumin April 15 aṭanga June 7 inkar khan Mualkhang leh a chhehvelah eirawngbawlna gas khawih ching-pen an enfiahnaah gas tihchingpen bur 265 an man a; gas khawih chingpenna hmanrua 'gun' an tih chu an man nual bawk.

Tun hnaia eirawngbawlna gas an khawih chingpenna hmun
ṭhin chu CYMA leh media lamin an kal chilh a, nang-chingin an man nghe nghe. Heng mite hian ualau takin kawngpui kamah gas hi an khawih chingpen ngam a, thil sual titute an ngampa hle mai hian ngaihtuah a tithui khawp mai.

Eirawngbawlna gas khawih chingpen hi ram pum pawi-sawina a tling a, harsa taka gas kan inchuh hnuah pawisa tam tham takin kan lei a, a buk a tling ta lo deuh vek mai hi a huattthlala takzet a ni. Hetiang titute hi dan angin na taka hrem ngei ni se, hei hi tihtawp a nih ngei theihna turin sorkar pawh a ṭan a ngai hle a ni.

Eirawngbawlna gas tih-chingpen dap chhuah a nihlaiin petrol leh diesel pawlh dalna hmunpuite pawh hi dap chhuah theih ni se a ṭha hle mai a, Mizorama petrol leh diesel a dal bik hi chu ngaihthiam harsa tak a ni. Pawisa tam tak sengin lirthei kan lei a, tunlai lirthei chhuak thar phei chuan petrol leh diesel thianghlim a mamawh lehzual a, chutihlaia kan lirtheia a tui kan thun tur tute emaw pawlh dal sa a man ngaia kan lei reng hi chu a zia lo hle.

Supply department leh a hnuaia Legal Metrology lam changtute hi an indaih lo a nih pawhin, kan police neih zozaite nen hian thapui thawhin hei hi chhui ngat ila, dap chhuah a harsa lo tawp ang. Gas khawih chingpentute Mizoramah ngei ualau taka kawngpui kama an chet ngam danah hian, sorkar hian a tih tur a ti tawk lo tih a chiang a, heti ringawta pawi khawihtu zawk an zalen reng hi a thiang lo.

CYMA an fakawm a, hma zau tak laka tih kim sen loh neih ai chuan, ram leh hnam humhalh an tumna kawngah hian kum khat na na na chu eirawngbawlna gas, petrol leh diesel tihchingpen dona leh ruihhlo do lamah hian insawr bing se, kan buaina tam tak hi chu an chingfel thei ngeiin a rinawm.