Lungleiah council of minister meeting

July 2, 2024 (Thawhlehni) khan Lungleiah Council of Minister ṭhutkhawm nghah a ni a, Mizoram sorkar a pian hnuah Aizawl páwn lama council of minister ṭhutkhawm neih hmasak ber a nia sawi a ni.

Aizawl páwn lama minister rualte ṭhutkhawm pawimawh tak nghah a ni hian ṭhatna leh ṭangkaina a nei nualin a rinawm a, chutih rualin, sawisel theih tak a ni bawkin a rinawm.

Mi eng emaw zat chuan Lungleia council of minister ṭhutkhawm neih a ni hi ṭul lo an ti niin a hriat a; a chhan ber chu sorkar sum sên titamtu mai nia an ngaih vang ni berin a lang.

Minister zawng zawng, sorkara secretary rual leh officer dang ṭhahnem tak an kal a, kalna atana senso, thlenna leh ei leh in atana senso leh thil dang atan sorkar sum tam tham tak hman a nih ngei a rinawm a; Mizoram ang state rethei tan chuan uiawm tham pawh a ni ang. Sum leh pai bakah, minister leh officer rual kal khawm ta chuan mipui nunphung pawh tihbuaina chin a awm mai thei. Heng zawng zawng ngaihtuah hian, Lungleia council of minister ṭhutkhawm neih hi ṭul loa ngai an awm a nih pawhin an demawm bik lo ang.

Minister zinga a tam ber chuan council of minister meeting-a tel tura Lungleia an kal hi thil dang tihna atan an hmang ṭangkai hle bawkin a lang. Anmahni hmuh duhte tana hmuh theihna hun siam te, department enkawl lai pisa leh hmunhmate tlawhna remchang atana hmangte an awm. Hengte hi minister leh Lunglei mipui tan thil ṭha leh ṭangkai tak, hlâwk tak a ni thei.

Ṭha titu leh ṭul lo titu awm thei ve ve karah, Lungleia council of minister ṭhutkhawm hi ram leh mipui tana ṭhatna leh hlâwkna paw chhuaktu ni se a lawmawm ang. A thim zawng zela thil thlir lo a, a êng zawng leh a hlâwkna tur lam thlir thiam a ṭul ve àwm e.