Thupek bawhzui ṭhat a ṭul

Chief Secretary leh Mizoram State Disaster Management Authority-a State Executive Committee Chairman chuan May 24, 2024 khan Disaster Management Act, 2005 Section 24(1) tlawhchhanin African Swine Fever léng avangin Mizoram páwn aṭanga vawk, vawksa leh vawksa aṭanga siam thil rêng rêng state pawn aṭanga lak luh khapna thupek a tichhuak.

Hetih lai hian, Mizoram páwn aṭanga vawk leh vawksa la luttu Star Farm neitu chuan vawksa an lak luh reng thu te, frozen food lak luh phalna an neih thu te, Mizoram pawn aṭanga vawk/vawksa lak luh chu state sorkar khap theih a nih loh thu leh India sorkar aṭangin phalna lâk tur a nih angin phalna an neih thute July 2, 2024-a press conference a neihnaah a sawi thung.

Mizoram sorkara hotu sang takin state páwn aṭanga vawk leh vawksa lak luh khapna thupek a chhuah a, chu chu state páwn aṭanga vawk/vawksa la lut ṭhin pakhat chuan state sorkar thuneihna a nih loh thu a sawi thung. Thu a inkalh a, mipui tan khawi nge dik zawk tih hriat a harsain a rinawm; Mizoram sorkara thuneitute'n an tihchian a ṭul ang.

State páwn aṭanga vawk/vawksa lak luh khap hi state sorkar tih theih ni lo se chuan Mizoram sorkara hotu sang tak hian khapna thupek a chhuah a rinawm loh a; a tih theih leh a thuneihna a nih avanga khapna thupek a chhuah a nih ngei a rinawm.

Vawk leh vawksa lak luh khapna hi May 24, 2024-a chhuah a ni a, thupek hlih thu hriat a la awm lo; thupek chhuah chhan - ASF a la leng mek zel bawk. Chuvang chuan, Mizoram páwn aṭanga vawk/vawksa lak luh khapna hi a la ding rengah a ngaih theih. Khap mek a ni chungin tute emaw chuan vawk/vawksa an lak luh zel thu ualau taka an sawi chhuak hi sorkar thuneitute'n an en zui a ṭul.

Sorkar thupekte hi bawhchhia leh palzût an awm leh awm lohte en zui a, enfiah a ṭul. Thupek ṭhenkhat chu langsar taka miin an bawhchhiat pawhin thuneitute lamin an bawhzui ṭha lo a, 'action' an la loa a lan cháng a awm fo. Vawk lak luh khapna thupek hi thuneitute'n an bawhzui a, bawhchhia an awm chuan bawhchhetute an hrem a ngai a ni.