Buhfai man tihpun leh sum hum

FCSCA Minister chuan July 3, 2024-a press conference a neihah, ration card var bikah buhfai man tihsan a nih dawn thu te, buhfaia VIP quota tihtawp a nih dawn thu te, CM, minister, MLA leh group A officer-te tana buhfai quota lei ṭhin tihtawp tum a nih thu te, retailer-te lawmman a pun dawn thute a puang.

Minister sawi danin, card var neite'n buhfai kg. khat Rs 15-a an khul ṭhin chu Rs 30-in an khul tawh dawn. Mizoramah ration card nei chhungkua 2,88,757 zinga 1,12,174 (38.85%) vel chu card var a ni a, chungte tan chuan buhfai man a pung dawn tihna a ni. Card eng leh pâwl nei chhungkua, ration card nei zinga 61.15% vel tan erawh a pung dawn lo.

Sorkarin thutlukna a siam hi mi tam tak chuan an demin a rinawm a, politics party-te'n inbeih nan tak an la hmang zuiin a rinawm. Political party-te hi chu party dangte hmalakna sawiselna tur zawng reng, sawisel tura inpeih at reng an ni rêng a.

Mizoram sorkar dinhmun a ṭha lo a, sum kal ralna eng eng emawah sum hum tumin hma a la a, buhfai man tihpun an rêl ta niin a lang. A nghawng tur card var neite chu khawsak harsa loa ngaihte an ni a; khawsak harsa zawk - ration card eng leh pâwl neite erawh a nghawng dawn lo.

Sorkar thutlukna hi a duh tan chuan sawisel leh dem theih a ni ang. Chutih rualin, buhfai man tihpun hian tute nge a nghawng tih te, ram leh mipui nâwlpui tan a ṭhat zawkna turte ngaihtuah tel erawh a ṭha.

Ration card vara buhfai man tihsan hi sorkar hmasaah pawh khan an lo tum tawh a, mahse, an tihlawhtling hman lo; an ngam chiah lo pawh a ni thei. Sorkar mekin an tipung tak tak dawn ta niin a lang a; ram tana ṭha zawk tur leh mipui, a bikin khawsak harsa zawkte tawrhna thlen lo tur a nih chuan party leh mi ṭhenkhat demna karah pawh ration card vár tana buhfai man tihpun tum hi huaisen takin kaltlangpui ni rawh se.

Chutih rualin, sorkar hotute pawh an insûm a, an fimkhur a ngai. Mi tam tak tawrhna tura sorkar sum hum tuma thutlukna siam a nih lai a, a lehlamah sorkar sum tam tak sênna tura party mite vûrnaa ngaih theih thil an tih zel si chuan a 'fair lo' hle ang.