CBI hnena general consent pek thu

Mizoram sorkarin CBI hnena an duh apiang chhui tura zalenna (general consent) December 28, 2023-a a pek tawh chu tun hnaiah a sûta sawi a ni a; mi tam tak, a bikin eptu party-te'n an dem.

The Mizoram Gazette, July 1, 2024-a tihchhuaha a lan danin, Mizoram sorkarin state sorkar hnuaia thawkte chhui chungchangah chuan CBI hnenah general consent a pe lo a, Mizoram sorkar phalna lâk phawt a ngai. Mizoram sorkar hnuai ni loa thawkte chhui tur erawh chuan Mizoram sorkar phalna lak kher ngai lo turin CBI hnenah general consent a pe thung.

Mizoram sorkara Vigilance department chuan July 4, 2024-ah CBI hnena consent pek chungchang a sawifiah. CBI chu December 28, 2023-ah general consent pek ni tawh mah se, July 1, 2024-ah criminal law thar Bharatiya Nyaya Sanhita, 2023 hman ṭan a nih avangin CBI-in a ruahman angin June 27, 2024-ah general consent a pe nawn leh a, Mizoram Gazette-ah July 1, 2024-ah chhuah a nih thu tarlan a ni.

Mizoram Gazette-ah, Mizoram sorkarin a hnuaia thawkte CBI-in a chhui dawn chuan Mizoram sorkar phalna lâk phawt a ngai tih tarlan a nih laia Vigilance thuchhuahin a huam chin bik tarlang chiang si loa CBI hnenah general consent pek a nih thu a tarlang hi a mak viau.

Vigilance thuchhuahah, "Tun hmaa Mizoram sorkarin general consent a lo pek leh tuna a pek thar hi thil thuhmun reng a ni a, sorkar chu a dinna ngaiah a la ding reng a ni," tih a ni a; Mizoram sorkara thawk leh thawk lote chhui turin CBI hnenah general consent pek a ni a tihna a ni. Official Gazette leh Vigilance thu hi a inkalh niin a lang.

Sorkar (Vigilance) sawifiahna hi a fiah lo a, Mizoram Gazette nen a inmil lo. Sap ṭawng thiam tan chuan Mizoram Gazette-a inziak hi hriatthiam mai theih a ni a, chutih rualin, hrethiam lo tam tak an awm ang. Chuvangin, sorkar hian chiang lehzualin CBI hnena general consent a pek chungchang hi a sawifiah a ngai a ni.

CBI hnena kawng tinrenga an duh apiang chhui thei tura general consent pek hi Mizoram sorkar hian ṭha a ti leh ta lo a ni thei a, chu chu a àwmna chin pawh a awm ang. Chuti a nih pawhin, ṭhaa tih loh chhante nen mipui hrilhfiah law law se a ṭhain a rinawm.