Politics inrawlh lo se

School Education minister chuan, tun hnaia zirtirtu lakah politics a inrawlh lo nia sawiin ram leh hnam chherna pûm berah politics a inrawlh chuan a fuh dawn lo tiin, "Tun hnaia sorkarin zirtirtu a lâk tharah a thiam thiam, a fit fit lak a ni. Politics a inrawlh lo. Hindi teacher lak tharah pawh a thiam thiam lâk an ni a, lâk tur qualify-in an daih lo zawk. Tu sorkar mahin an tih ngai loh chu tun sorkarah hian tih a ni," a ti. 

School Education minister thusawi hi thil lawmawm tak a ni a, politics a inrawlh lo tak tak nge a inrawlh tho tih erawh ngaihdan a inang lo thei ang. Mizorama thil pawi ber chu sorkar hna laka politics a inrawlh fo mai hi a ni a, a tling leh thiamte aia politics vanga hmelhriat nei ṭha lâk an nih fo avangin ṭhalai tam takin sorkar hna lâk danah rinna an nghat ngam tawh meuh lo. 

Sorkarin a hlawmin zirtirtu a la a, chutah chuan sawi neuh neuh a tam hle. Sorkarin a hlawma contract-a thawk tur langsar taka zirtirtu a lâk hnu lawkah vàntlâng hriat lem lohin zirtirtu tam tham tak an lo la leh reng tho si a, chutah chuan 'iptepui banna' tia insawipuina lehkha ziakte hmuh tur a awm nawk a ni. An bial mi a nih thu leh duhsak theih dana duhsak tura ngenna leh an posting tur thlenga rawtna lehkha MLA-te aṭang pawhin a awm a, a vanduaithlak takzet a ni. 

Minister berin poli­tics inrawlh loh thu a sawi hi chhuah­chhal emaw, hnial emaw a ṭul ber lo ang a; chutihlaiin zirtirtu laka insawipuina lehkha ziak hrang hrang hmuh theihah chuan MLA-te ngei pawhin an sawipui hial tih chu finfiah theih a ni lawi si. 

Engpawhnise tun hnu zelah sorkar sikul zirtirtu lakah a thiam leh tling zel chauh lâk ni tawh se, political party mi leh sâ kan induhsak dâwn a nih pawhin kawng dang zawn thiam ni se Mizoram zirna hian hma a sawn phah ngei ang.