Tui harsatna leh PHE harsatna

Public Health Engineering department chuan press release hmangin Aizawla tui harsatna sukiang turin theihtawp an chhuah mek mah se, khawl hrang hrang a chhiat vanga harsatna aṭanga ngai awh leh turin thla khat zet a la duh dawn a, tui ren tur leh ruahtui lo khawl turin mipui an ngen.

PHE hian May 28, 2024-a Cyclone Remal vanga nasa taka Tlawng lui lianin tui pump khawte a tihchhiat avangin tui ren tur leh ruahtui khawl uar turin Aizawl mipui an lo ngen tawh. PHE tui pump khawlte leh hmunhmate a chhiat hnuah ni 40 vel a liam ta a, hemi chhung hian dan pangngai anga tui an pump leh thuai theih nan nasa takin an thawk ngeiin a rinawm.

Aizawl mipuiin hnianghnâr taka tui an dawn ṭheuh theih nan PHE department-a thawkte'n theihtawp tak meuh an chhuah a, an inthlahdah lo ang tih hi a rinhlelhawm loh. Tunah beisei angin PHE tui dawng thei lo mah ila kan tan theihtawp an chhuah a ni tih mipuite'n kan hriatpui a ṭha.

Chutih rualin, mipui an lo phun a nih pawhin sorkar hotute leh PHE lam pawhin an hriatthiam ve a ngai ve bawk. PHE-in ruahtui khawl tura mipui an chah a, mahse, Aizawla chhungkaw zatve aia tam mah hi ruahtui khawl thei lo an ni hial mai thei. Chuvang chuan, PHE tui an mamawhna a sang hle ang.

Khua leh tuite hnena ni tin mamawh chi hrang hrang ngaihtuahsak leh pek hi sorkar awm chhan a ni. Hnianghnar taka mipuiin ni tin mamawh an neih theihna tura hmalak hi sorkar hotute intiamna leh thil tum a ni ṭhin bawk. Mipui ni tin mamawh zingah tui a pawimawh tak zet, hnianghnar taka khua leh tuite tui pek hi sorkar mawh a ni.

Aizawl mipuiin an mamawh ang tui an hmuh leh thuai theih nan sorkar hotute leh PHE-a thawktute ṭang mar sauh sauh se, harsatna sukiang thuai se tih hi tuna mipui nghahfâk a ni.