YMA

Kum 1935, June 15-ah Young Lushai Association a ding a, a hming hi thlakin Young Mizo Association (YMA) tih a ni zui ta a, YMA din cham hi Mizoram sorkar chuan sorkar chawlhah a puang a, YMA branch dinna khaw hrang hrangah he ni hi lawm ṭhin a ni.

YMA Day hi hman dan a inang lo a, branch tam ber chuan hnatlangin khawlai an tifai a, vantlang tana thil ṭangkai an ti a, ṭanpui ngaite ṭanpuina niah an hmang. Chhun leh zana intihhlimna hun buatsaih an awm a, YMA sports leh thil hrang hranga inelna an siam bawk a, he ni hi mi tam tak ni nghahhlelh a ni ṭhin a, ruai nena lawm an awm bawk ṭhin.

He ni hi ṭangkai taka hman a nih piah lamah ni nghahhlelhawm, nula tlangvalte'n hlim leh lawm taka an hman theih niah siam chhunzawm zel ila, sorkar chawlh a nih remchanga laa programme dang lo siam tum hi awm lo ṭhin se a ṭha hle. YMA Day a ni a, YMA-in a lawmna a siam piah lama pawl dangin emaw thil dang tihna nia an hman loh hi a inhmeh hle a ni.

Engpawhnise YMA tluka Mizo mipui tana pawl ṭangkai leh thawh hlawk hi pawl malah chuan a awm kher lo ang a, he pawl hi pawl thianghlim leh belhtlak, politics leh kohhran âwn lam nei lo, Mizo ram leh hnam ṭhatna tura ding ni chhunzawm zel rawh se.

YMA a thianghlim a, a zahawm chhun-zawm zel theihna turin hruaitu ṭha an pawimawh. Tute emaw politics kai-lawn remchang, sorkara an tlaktlumna tur leh contract leh supply thlenga an dil hmuh awlsamna turah a hruaitu nihna hi kan chhuah palh a hlauhawm a, a venpui theitu chu YMA member tinte kan ni ang.

He pawl zahawm leh ropui, Mizo fate tana pawl ṭangkai hi chak takin kal zel se, Mizo ram leh hnam tan YMA hian ke pen zel rawh se.