Kum tharah taima zawkin

Kum 2015 a lo thleng leh ta a, vawiin hi Mizo mipui tam zawkin kum thara hna bul kan ṭanna ni a ni ang.

He kum thar a lo thlen hian mi ṭhenkhat chuan thil hi thar deuh vuk tur leh danglam viau turah an ngai mai thei a; nimahsela thil hi a la pangngai reng a, nikum nen khan a danglam tam lo.

Hetihlai hian kum a lo thar hian miin rilru thar a put chuan engkim mai hi a danglam ṭhin zawk a, thil pangngai reng pawh hi rilru thar nena kan thlir chuan nasa takin a danglam thei. Hnam upa zawkte chuan kum a thar ruala hmasawn an tum avangin kum thar thutiamte pawh an nei ṭhin a, kum tharah thil ṭha zawk tih tumin anmahni an intiam ṭhin.

Kum a thar ta a, he kum thar hi tu tana kum ṭha tur nge a nih a, tute tana kum ṭha lo tur nge a nih hriat a la ni lo. Mi taima leh thawkrimte tan chuan hlawhtlinna kum a ni ngei ang a, mi thatchhia leh awm ṭha duh lo tan erawh malsawmna kum a nih thut theih a rinawm chuang lo.

Hei vang hian kum thar hi kan tana kum ṭha a nih ṭheuh theihna turin mahni lam insiam ṭha ila, kum liam ta aia taima zawkin hnathawk ila, rinawmna leh tawrhchhelna nen he kum thar hi hmang ila; kan thawhrimnate malsawma awmin kan zavaia tan kum ṭha a nih ngei a beiseiawm.