Damdawi-ina awm man bâ peksak

Synod Hospital chuan kum li kal ta chhungin Hospital Charity Fund aṭangin damdawi-ina awm mi 2,377-te awm man an peksak a, chu'ng zinga mi 740 chu kohhran/sakhaw dangte niin, bá an peksak zat chu Rs 1,63,46,002 (nuai 163.46) a ni; ba a peksak zawng zawng aṭangin 30.66% a tling.

Synod Hospital-in damlo an enkawl, inenkawl man pe thei lote kum li chhunga mi 2,377 lai a peksak hi a ropui a, kohhran pawl dang leh Kristian ni lo mi 740 lai maite inenkawlna man cheng nuai 163.46 lai a peksak phei hi chu a lawmawm tak zet. Mizorama kohhran lian ber an nihnaah mi dangte an kêp hi a ropui a, Pathian lawm zawng tak a ni ngei ang.

Damdawia inenkawl hi mi retheite tan a harsa zual a, chutih laiin, damdawi-inah an awm lo thei bik si lo. Chuvang chuan Synod Hospital-a inenkawl zingah pawh awm man pe thei lo tam tak an awm ta niin a lang. Chutih laia damdawi-in hotute'n an kohhran mite mai bakah, kohhran dang mite leh hnam dangte thlenga damdawi-ina awm man bá peksak duhna an nei leh an peksak hi a ropui hle.

Miin natna a neih miau chuan damdawi-inah inenkawl loh theih loh a ni a, rethei leh hausa, chi leh sakhua inthliar chi a ni lo; rîkrum thilah phei inthliar hman a ni hek lo. Synod Hospital-in mi retheite awm man bá an peksak ang chi a ṭulna chin a la awm foin a rinawm a, private hospital dangte pawhin an damlo enkawlte an hriatthiam a ngaih hun a awm fo ang.

Hetih rual hian, ngaihsak loh hrim hrim vanga damdawi-ina awm man pek lohte pawh thil awm thei a ni a; mipuiin damdawi-ina awm man pek theih kan tum hram hram a ngai.

Synod Hospital-in damlote bá a peksak theih chhan hi kohhran mipui leh mi thilphalte thilpek vang a ni. Kohhran mipui leh mi hausa zawkte'n mi rethei tak tak, damdawi-ina enkawl ngai si an awm ṭhin a ni tih hriain, mi dang kêpna rilru pu zel thei ila a lawmawm ngawt ang.