Hunpui, Covid-19 leh inhmuhkhawm

Health minister hoin tun hnai khan sorkar mi pawi­mawhten Mizorama Covid-19 dinhmun an thlir a, hunpui lo thleng turah khauh zawka hripui dona kalpui an rel. Khawvel hmun dangah chhungkaw inhmuh khawmna aṭanga hri inkài darh an tam avangin Mizoramah fimkhur a ṭul thu an sawi a, hunpui vuakvetah chhungkaw pakhata cheng ho ni lo chu chhungkhat laina chaw eikhawm leh inhmuhkhawm buatsaih loh ni se an tih bakah sorkar dan bawhchhe zawnga ṭhian leh páwl in­hmuh khawm buat­saih loh ni se, an ti. 

Covid-19 dona kawngah Mizoram hi a tiṭha ber zinga mi kan ni a, sorkar, khawtlang leh kohhran thlenga kan ṭan rualna rah chhuah a ni. Sorkarin hripui a dona turin mipuiin pawisa an thawh khawm hial a, mi hausa leh neinung chang ni loin mi harsa zawk nia langte pawhin hri dona atan an phak ang tawkin sum an thawh khawm a; hlawh neih chu sawi loh hna ṭhulhin patling ni tam tak an duty a, ṭhenkhat phei chu zan riakin an kal chhuak hial a, hengte hi state dang aia Covid-19 laka kan him zawk theih chhan lian tak niin a lang a, kan ṭan rualna hi a lawmawm hle.

Tunah hunpui kan thleng dawn ta a, sorkarin hripui laka kan him zel theihna turin ruahmanna a siam a, hengte hi zawm theih a ṭha khawp mai. Krismas leh Kumtharah kohhran inkhawm a awm dawn loh bakah a lawmna ruai pawh ṭheh lo turin sorkarin ngenna a siam a. Chutihlaiin remchanga laa chhungkaw bil, ṭhianho bil leh ṭhen­awm hnaivai chaw ei khawmna leh inhmuhkhawmna huna kan hmang a nih chuan a pawi thei hle dawn a ni.

Covid-19 hian mihring nunna a lak mai bakah a la damte pawh mi tam tak hnathawk hleithei loin a siam a, an hna an chânin an eizawnna nasa takin a khawih pawi a ni. Chu dinhmun harsa tak chu kan tawn nawn fo lohna turin hripui laka kan fihlim a pawimawh a, chumi tur chuan thuawihna kan mamawh takzet a ni. 

Hetihlai hian kan sorkar miliante zawk vantlang hmuna mask vuah loa hmuh tur an awm fo hi a pawi a, inhmuh­khawmna lian tham an la buat­saih fo maite hi mipui zah lohna a ni a, dan pawisak lohna­ah a puh theih hial bawk ang. 

Krismas leh Kumthar lo awm turah hian sorkar thupek zawmin, mahni chungkaw bil ni lo inhmuhkhawm leh chaw ei khawmte buatsaih loh ni thei se a lawmawm hle ang.