Policy

MPC president chuan, tun hnaiah political party ṭhenkhatin policy leh programme an duan thar chu an policy tihhlawhtlin tum lam aiin, a thar duan chhuah hmanga mipui hîp tuma intlansiakna a nih thu a sawi. Hetihlai hian Congress party chuan thuchhuah siamin, MNF party chu policy mumal pawh nei lo, inthlan a hnaih apianga policy hming leh kalphung thlakah an puh.

Political party-te hian policy an nei ṭhin a, chung zingah chuan Congress party-in flagship policy ang hiala an kalpui NLUP hi a langsar ber a ni awm e. NLUP hi a taka kalpui a ni ta a, rah ṭha tak tak a neih rualin hlawhchhamna ruam leh a kalpuitute tana mualpho phahna ang hialte pawh a keng tel. NLUP hi an sawi vul tehlul nen, a duang chhuaktu lamin an term hnihna an hman zawh hmain New Economic Development policy (NEDP) an sawi thar leh ta a, NLUP chu a duangtute ngeiin an duh khawp lo niin a puh theih.

MNF khan Mizoram Intodelh Project (MIP) an kalpui a, an hlawhtlinpui lem lo tih hi mipui tam zawk ngaihdan a ni ang. Tunah hian MNF-in kut hnathawktute an hlawhtlin ngei theihna turin suma ṭanpuina (financial support) pek an tum thu a sawi a, Socio Economic Development Programme (SEDP) tia an vuah chu a kalpui dan tur pawh an ruahman fel vek tawh thu an sawi.

Mizoram political party lian deuh pahnihte policy hmelhriat dan leh kalpui an tum dan en hian, a taka intodelna lam aiin mipui tihlawma an luta pawisa daha an vote neih an tum ber niin a puh theih. Political party-in mipui hnena a zawrh hi mipuite hnena sum pek let tumna lam hawi deuh vek a ni a, tun ang zela kan kal chuan Mizoram hian hma a sawn mawh hle ang tih a rin theih.

Ramin policy a neih ṭhata a bawhzui ṭhat bawk chuan hma a sawn ṭhin a, India ram chhungah pawh policy nei ṭha state chu nasa takin a ṭhang. Mizorama pawisa lo lut zan en hian, a chhunga cheng mi nuai 10 bawr vel ṭha taka enkawlna khawp sum hi a lo lut a, hengte hi policy ṭha tak bawhzuina atan hman ni se, heti mai hi chu kan ni lo ang. Hmasawn tur chuan policy neih ṭhat a pawimawh a, mipui tihlawm tumna leh vote zawnna policy anga puh theih thil zawrh hi i sim tawh ang u.