Martar politics

MNF ṭhalaite chuan tun hnaiah CTI, Sesawnga Congress ṭhalaite'n Mizo Hnam Martar Thlanmual an siam chu an tlawh a; thu an ziah dan chu lungchhiatthlak an tih thu an tarlang.

Tun hnaiah Congress president Lal Thanhawla chuan martar ruhro phumna sawn chungchangah thu a sawi a, hei hi MNF lam chuan na takin an chhang let. Congress hotupa hian ruhro hmanga inawi nun tum angin MNF hi a puh a; MNYF lamin hetiang boruak awmlai hian nidanga an tlawh zen zen loh CTI-a Congress lamin an siam martar thlanmual an tlawh ve leh bawk.

Remna Ni a thlen dawnin lal-
ṭhutthleng inken leh inken lohah inhnialna a chhuak ṭhin a, remna a thlen theihna atan thawh hlawk zawk leh inphah hniam zawk nih an inchuh fo ṭhin. Remna Ni hi inrem lohna niah kan chhuah ta lek lek a, chuvang pawh chu a ni mahna, Central YMA-in a huhoa Remna Ni hmante pawh a rawt chhuak ta hial a ni.

Mizoram tana nunna pe a, martar hialte chungchanga inhnialna a rawn chhuak thar leh ta hi a zialo hle mai a, heng thil hi sawi chhuah ṭul lo a ni a, politics-a hamṭhatna zawnna tur chi a ni tawh lo. Markarte ruhro thu-ah emaw, martar thlan-mual siam dan-ah pawh ni se, poli-tics nena chawm pawlha inhnialna chawh thawh fo hi kalsan a hun ta.

Ramin hma a sawn a, ṭhalaite pawh khawvel tukverhah an dak chhuak ve
ṭan mek a, hetihlaia tun hma politics hlui leh thutlukna dik siam hleihtheih lohnaa inhnial fo hi sim a ṭha. Martar chungchang politics huanga seng luh thar leh hi a hun tawh lo a, Mizorama political party lian pahnihte inhnialnaah hian ram hmasawnna tur zia a lang tlem ṭhin hle a ni.