Sorkar sum renchem

Mizoram sorkar sum dinhmun a ṭhat loh thu Chief Minister leh Finance Minister-te'n tun hnaiah an sawi ri fo a, sorkar hnathawk ṭhenkhat hlawh la thei lote pawh an awm a; Mizoramin plan fund a hmuh tlem avangin NEC hnuaia hnathawh chhunzawm theih lohte pawh a awm thu CM-in a sawi.

Thawh chhuah nei lo state Mizoram tan chuan sorkar laipui aṭanga sum lo kal a tlem hian state pum a nghawng a, mipui khawsak thlengin a nghawng. Mizoramah sorkar hnathawk an tamin Mizoram budget tam tak hi an hlawhah a kal si a, sorkar hnathawk hlawha kal bak a bang a tlem tawh avangin mipuiin an tuar lo thei lo.

Sorkar hian sum renchem tumin ṭan a la a, tun dinhmunah chuan a hlawhtling teh vak lo niin a lang. Mizoram sorkar lo kal tawh danah mahni inawm tlei zawng leh a thawktu lam nawmsak hmasakna turin thil tam tak hi duan a ni a, chumi lan chhuahna chu VIP-te lirthei lei danah pawh kan hmu thei. He thilah kher lo pawh, sorkar hian dah hmasak tur a dah hmasa lo a, a rawngbawlsak tur mipui aia a rawngbawltu sorkar hnathawkte leh minister-te an invulh nia a lan tlat avang hian sorkar sum renchem tum hi a sawt mawh hle.

Sorkar hian sum renchem a tum a nih chuan a lu ber aṭanga inṭan a ngai a, tun hma anga sum hman huau huau tur awm ta lo ringawt hi inrenna a ni lo a, sum hman tur a awmna zawnah pawh awmze nei leh indaihzai taka hman tum hi inren dan dik chu a ni ang. Tunah hi chuan sorkarin sum a neih tamna deuh zawnahte hian an inren a ni tih hriatthiam a la harsa deuh a, hengte hi sun inenkawl dan fel leh fing zawk nen chuan ven theih a ni ngei ang.

Sorkar sum che vel hi tuna kan neih ang ang pawh hi khauh leh uluk zawka kalpui chu ni se sum harsatna hi a ziaawm deuh mai thei a, kan kalphung (system) tam tak hi siam ṭhat mai pawh ni loa thlak hlawk ngaite pawh a awm ang. Sum renchem kan duh tak tak chuan renchem ngam tura kan inpek a ngai a, chu chuan kalphung thlak thlengin a kâwk dawn a ni.