Police officer-te vaukhanna thu

Mizoram Police Service Asso-ciation (MPSA) inkhawmpuia khuallian Home minister R Lalzirliana chuan, thupek zâwm lo police officer-te lakah na zawka action lak a nih tur thu a sawi a, tun hmaa an chìn ṭhin ṭha lote paih vek a ṭul thu a sawi a; police officer-te chu an lakah minor penalty ngawt ni lo, hremna na zawk lek a nih pawhin anmahni inen lêt ve a, amah dem lo turin a chah.

Home minister berin police officer inhmukhawm heti taka thu a hrilh hian Mizoram police-te inawp dan thui tak a hril niin lang a, Home minister-in vawi tam hrilh nawn ngai khawp officer an awm a ni ngei ang. Police officer-te hi hnathawk ṭha tak tak leh inpe zo an awmlaiin, hnathawk ṭha tawk lo, sorkar mi leh sa mahni tana chhawra dik lo taka thil ti an awm tih a lang chiang hle.

Tun hnaiah pawh police officer-te mualphona tur thil a thleng a, tun hma phei chuan hetiang hi a tam ṭhin hle. Mahni hna atana police dangte chhawr a, mahni loa fehtir a, huana riahtir a, insaknaa hnathawhtir ṭhin police officer hi an tam hle. Home minister hian tihtawp a tum thu a sawi tawh
ṭhin a, tun thlengin a la titawp thei lo a nih hmel.

Home minister-in police officer-te vaukhanna thu a chhuah hial hian hetianga sawitirtu an awm tih a tichiang a, police officer lam pawh an inennawn a ṭha hle. Inthlan dawn a ni emaw ni lo emaw khauh taka kal an tum thu a sawite hi thil ṭha tak a ni a, a hrilhate hian ṭha takin lo dawngsawng hram se, tun hmaa a vaukhanna khan ngaih pawimawh a hlawh lo a nih pawhin tuna mi hi chu ngaih pawimawh loh theih loh turin Home minister hian umzui ngei se a ṭha ang.

Home minister hian office chhunga an inawpna lamah ṭha takin he thu hi a lo sawi tawh ngei ang a, tunah chuan police officer rual kal khawmnaah a sawi chhuah a ngai ta hial. Police officer lam pawhin Home minister thusawi hi ṭha takin zawm se, zilhhau ngaiin tumah awm lo se, Home minister pawhin a thusawi hi a takin umzui rawh se.