Zuk leh hmuam do ngam kohhran

UPC (North East India) Aizawl East District-te chuan Jannuary 1, 2015 aṭang khan zûk leh hmuama fihlîm lote chu pulpit aṭanga Pathian thu sawi an phalsak lo a, zûk leh hmuam ti ṭhinte thu sawi tura ruat an nih pawhin, lecturn aṭangin an sawitir a ni.

Zuk leh hmuam hi kan ram hmelma lian tak pakhat a ni a, a hnawksakzia leh zuk leh hmuam avanga kan tawrh nasatzia hi tlang hriat a ni. Zuk leh hmuam vangin natna khirh tak tak kan vei a, cancer vei tam zawkte hi zuk leh hmuam ti ṭhin an ni a, zuk leh hmuam thihpui ta hi mi tam tak an awm. Hei bakah hian zuk leh hmuamah sum tam tak kan khawhral a, zuk leh hmuam nghawng natna inenkawlna atana kan insente nen phei chuan zuk leh hmuam avang hian Mizoram sum hi a luang ral hnem takzet a ni.

Hei vang hian mi ṭhahnem­ngaite'n zuk leh hmuam hi an do a, nasa takin thapui an thawh a, kohhran ṭhenkhatte phei chuan zuk leh hmuam timite chu an pulpit thianghlima din chhuah an rem ti ta lo hial. Zuk leh hmuamin kan ram a tihbuai nasat dan en hi chuan, kohhran hrang hrang hian tun aia nasa zawka do awm tak a ni a; ram dang kohhranahte phei chuan zuk leh hmuam ti ṭhin hi zu in ai pawha ṭha lo hiala an ngaih avangin rawngbawlna pawimawh chelhtute chu zuk leh hmuama fihlim tura ngaih an ni ṭhin.

Mizo zingah chuan zuk leh hmuam hi kan ngaizam hle mai a, a ṭhat lohzia leh a nghawng pawizia hre chung pawhin zuk leh hmuam tih hi kan inthlahrung lo a, zuk leh hmuam titute pawh an la ngampa hle. Hetiang dinhmuna kan dinlaia a taka zuk leh hmuam do ngam kohhran an pung zel hi a lawmawm a, kohhran hian tih tak zeta a do chuan kan khawtlang nuna kohhran pawimawhzia en hian Mizoramah zuk leh hmuam ti ṭhin hi an tlahniam thei ngeiin a beiseiawm.