Sorkar sum sên tihtlem dan zawn

Mizoram sorkar chuan Secretariat leh department-a officer lian, in lama muster roll an kawl theih chin a titlem dawn a; hemi chungchangah hian DPAR Administrative Wing-in July 8, 2024 khan hriattirna (office memorandum) a tichhuak a, August 1, 2024-ah hman ṭan tur a ni.

Office memorandum-a a lan danin, officer liante'n MR an kawl zat tihtlem hi sorkar sum sên tihtlemna tur chi khat a ni a; officer liante MR kawl theih zat tihtlem a nih bakah, officer ṭhenkhat chu MR kawl tawh lo tura tih a ni.

Mizoram sorkar hian sum thawh chhuah a nei tam lo a, hun eng emaw ti aṭang khan eng lai pawhin sum harsatna a awm reng emaw ni chu tih tur a ni. Sorkar sum sên titlem tura sorkarin hma a la ṭhin hi a lawmawm. Officer-te'n MR an kawl theih zat tihtlem pawh hian awmzia a neiin a rinawm a, thutlukna siam tawh, office memorandum pawh chhuah tawh a nih angin kaltlangpui ngei ni rawh se.

Sorkarin sum sen tihtlem dan tur a zawng a, kawng hrang hrangin hma a la mek. Minister-te lirthei kawl theih zat tihtlem te, MLA-te lirthei leisak loh tihte leh thil dangte pawh an lo tih tawh. Buhfai leina atana sorkar sum sên tam lutuk pawh a tlem zawk theih nan ration card vár tana buhfai khulna man a lêta tihpun tum a ni.

Sum renchemna atana Mizoram sorkarin hma a lakna zawng zawng hi thil âwm tak vek a ni a, mipui náwlpui pawhin ṭha an tiin a rinawm.

Thil ṭhenkhatah sum renchamna tur hrang hrang a kalpui mek lai a, thil dangah sum tam tak sên belhna tur a siam thar zel a, party mite vûrnaa ngaih theih thil, phuahchawp tak tak thlenga a ti leh tlat tho si a nih chuan a fel lo hle ang. Sorkar hi a fimkhur a, a insûm a ngai a, party mite vûrnaa ngaih theih hna insiamsak belh lo zawnga a kal a ngai a ni.