Intihhlimna thianghlim

Kum 2014 Krismas leh Kum 2015 kum thar vuak vetah Mizorama khaw hrang hrangah kawn an chei mawi nasa a, a bikin Aizawl khawpuia veng hrang hrangah kawn chei hi an uar a; mipuiin an hlutin tlawhtu an ṭhahnem ṭhin hle.

Mizote hian kût nei ve bawk mah ila hnam dangin an kût neih an nghahhlelh leh an hman uar angin kan hmang ve lo a, kan kûtte hian kan thinlung a khawi tawh meuh lo a, kan lawm danah pawh mipui nawlpui hi chu kan tel ve mang lo. Kristian kan nih hnuah Krismas hi kan hunpui ber a ni chho ta a, kan lawm dan pawh a inher danglam hret hret a, Krismas leh kum thar inkar vel hi intihhlimna thianghlim hlimawm tak tak neihna hunah kan hmang uar chho ta.

Mihring nun hian mamawh tam tak a nei a, hengte hi kan chhût ngun loh chuan thil hi khap beh vek theih leh thununa hliah bo vek theih emaw tih mai a awl. Tunah chuan kan hnamin hma a sawn zel a, mihringin intihhlim a mamawhzia hriain khawpui chhehvelahte picnic spot leh resort nuam tak takte a ding nual tawh a, hei hian hnam nun zawi zawia insawi che mek a lantir thei awm e.

Krismas lai vel denchhena intihhlima chi hrang hrang siamte pawh hi sawiseltu awm bawk mah se thil ṭha tak niin a lang a, Biak In pawn lam programme a nih tawh avang hian tih-kohhran ngun mai an tum lo a nih pawhin ngaimawh lo ila, Biak In pawn lam intihhlima thianghlim neih hi sualah puh lem loin ṭha tak leh thianghlim taka kalpui zel dan hi khawtlang hruaitute lam hian ngaihtuah zel se a ṭha hlein a rinawm.

Tunah hi chuan kan ṭhalai leh naupangte hian intihhlimna thianghlim hi an zawngin an ûm tawh a, tun hmaa picnic-a ruih kher tumna boruakte pawh kha a lo bo ṭan ta. Hei hi Krismas bawr boruakah pawh an chhawm zel a, hlim tak leh thianghlim taka intihhlimna an zawng a, chu chu kawn chei enna hmunahte leh thil remchang dangah an zawng hmu ni maiin a lang a; hengte hi tihtawpa khap beh lam aiin, fel leh awmze nei zawka kalpui zel dan zawng ila, intihhlimna thianghlim zawk neih zel hi kan ṭhalai leh naupangte tan a ṭha ngei ang.