Ruihhlo kan hmelma lian a la ni reng

Excise & Narcotics department chhinchhiah danin kum 2014 chhung khan damdawi hman sual vangin Mizoramah mi 38 an thi a; heng zinga 36 chu mipa an ni a, pahnih chu hmeichhia an ni.

Mizo ṭhalai mi 38 zet kum khata suattu ruihhlo do kawngah hian kan sorkar leh tlawmngai pawlte hi an thawm a zawi ṭan deuh emaw tih theihin a awm a; nimahsela kan ram dinhmun dik tak kan en chuan kum khat chhung ringawt pawhin kan ṭhalai tam takin an thih phah a, mi tam takin harsatna an tawh phah bawk a, chuvangin ruihhlo do hi bansan chi a ni lo.

Tlemlai deuh khan YMA-in thapui thawhin ruihhlo a do a, an thawm a na deuh bawk nen mi tam takin an sawisel a, sawiselna tur pawh an awm ngei ang. Ngun taka ngaihtuah tel ngai erawh chu YMA-in ruihhlo do beihpui a thlaklai khan ruihhlo vanga thi an awm mang lo a, tunah erawh an tam leh ta hle.

Mihring nunna aia pawimawh hi he khawvelah hian a awm tak tak lo a, nun kan chân phahna ruihhlo do hi thapui thawha chhunzawm leh ngei chi a ni. Sorkar leh tlawmngai pawlte hian ruihhlo do hi chak taka an chhunzawm loh chuan, an rawngbawlsak tur Mizo ṭhalaite nun a suat zel palh ang e.