Hre hmasatu nih duh

Tun hnaiah Mizoramah internet leh inbiak pawhna dangte a lo ṭha tawh a, hmun kilkhawr bera mi chanchin pawh kan inhre tawn zung zung thei. Hei hi kan ṭangkaipui rualin buaina thlentu a ni ve mek a, fimkhur taka hman thiam a ṭha hle.

Internet kaltlanga ṭhian inkawmna Facebook-te pawh Mizoramah kan hmang uar ta hle a, kan mobile phone-te pawh a changkangin a tih theih pawh a tam sawt hle. Tun hnaia thlalak thehdarh tam berte chu mobile phone kaltlangin a ni a, thil hlimawm leh ṭha tak ni si hi pawi khawihna hmanruaah kan chhuah palh thei a, fimkhur a ngai hle.

Hre hmasatu nih kan duh luatah mipui hriat chak zawng hria leh hmu hmasatu chuan rang taka thehdarh vat a duh a, hei vang hian dan bawhchhiatna pawh a thleng thei a, a dik tawk lo thehdarh vak theih a ni bawk. Mihring ruang thlalak, saruak thlalakte leh midangte mualphona thlen thei thil thehdarh hi dan kalh a ni a; hre loa hetiang thil thehdarhtu tam tak an awm ang a, hre reng chunga thehdarh pawh a awm theih ngei ang.

Hre hmasatu nih inchuh hi tunlai khawvelin a ken tel ni mah se, Mizote hi chuan hre dik hmasatu nih tum ila, kan thil hmuh leh hriat puanzar danah pawh a chintawk kan hriat a hun tawh hle. Media lama thawktute inzilh leh infuihna ni ṭhin kha tunah chuan mipui nawlpui infuihna atan hman a ngai ta a, thiamna a san tawhna khawvelah hian thil kan hriatte kan thehdarh tur chin i thliar thiam ang u.