Mizoram Police an fakawm

Tun hnaia Zarkawt tlangval tualthihnaa inhnamhnawih ni ngeia rin chu Mizoram Police-te'n manin an kawl mek a; hetihlai mek hian Republic Venga chhiatna rapthlak tak thlengah Police-te hian an tih tur ṭha taka tiin mipui thinrim boruak sosang karah boruak an hmet dai thei.

Mizoram Police-te hi duh khawp lohna tam tawk awm ṭhin bawk mah se, buaina chinfel leh hnuchhui chungchangah hian India rama police ṭha pawl tak an la ni reng tih tun hnaia thil thlengah kan hmu a, an hnathawh dan a fakawm hle. Hetihlai hian police-te hi an mal ṭan thei hauh lo a, anmahni puitu khawtlang hruaitu ṭha tak tak an awm ṭhin a, heng mite hi an thawhho thiam phawt chuan kan ram hmalam hun atan an ṭangkai chhunzawm zel ngei ang.

Police zingah mahni hna tlin lo tak hi an awm ngei a, police ni si ruihhlo bawiha tângte leh duty laia rui chunga hmuh turte pawh an awm. Heng bakah hian tun hmaa Mizoram Police chhuanawm tak anga huaisen leh tlawmngai, mahni duty hun a nih leh nih loh pawh sawi loa rukru ûm leh hnuchhui lama inpe mi kha an vâng ṭan tawh a, case chinfel lohte thlengin a tam sawt hle. Hetiang police-te hian an hna pawimawhzia leh an mawhphurhna sanzia hre chungin harh chhuak se, Mizoram mipuite'n police venhim an mamawhna a sanlai tak hian insiam ṭha rawh se.

Tualthihna thlengah hnuchhui harsa deuh turah pawh police lamin fing leh thiam takin ṭan an la ṭhin hi a lawmawm a, mipui pungkhawmte thiam taka an hmachhawn danah pawh fak an phû hle. Hetihlai hian buaina tipunlun thei zawng leh hnuchhui tiharsa thei khawpa thil thehdarh ching mipui leh media lama thawkte thlenga kan awm hi a pawi a, police-te hnuchhuina atana pawimawh turte thlenga vantlang hriata tlangzarh a, hre hmasatu leh hre chiang bik nih tuma hmanhlel an awm bawk a, sim a hun tawh hle.

Mipui vantlangin an hriat tur chin thil hi a awm a, chanchinbu leh TV-ah hian media lama thawktute hian puanzar hi hmanhmawh thawt thawt lo se. Tunlai internet khawvelah phei chuan fimkhur a ṭul a, police-te tana hnawksak khawpa bengvar mipui leh media-a thawktu a awm theih a, insûm thiam a ṭha. Tun hnaia chhiatna thlenga Mizoram Police-te chet dan hi a fakawm a, hei hi anni lam pawhin infuihna leh intehna atan hmang se, Mizo mipuite thlamuantu ni ṭhin Mizoram Police dik tak kha han kaitho leh teh se.