Mipui pungkhawm rorel

Tun hnaiah Republic Vengah tualthahna rapthlak tak a thleng a, mipui thinur pungkhawm chuan tualthattu chunga phuba lâk an duh a, amah an dahna in pawh an tâwng hial a, police leh khaw­tlang hruaitu ṭhen­khatin hliam an tuar.

Tun hnaia thil thleng hi chu Mizoram chu sawi loh khawvel hmun dangah pawh thleng zen zen lo thil huatthlala zual bik a ni a, a tuartu chhungte lainat vang leh pawi khawihtu chet dan rawng tak avanga mipui thinrim hi an demawm hran lo. Mipui zinga phuba lâk duhna rilru sosang pawh hi thil mak a ni lo a, a phû tawk nia an hriat dana khawih ve mai duhna rilru an pu hlawm a ni.

Mizoramah misual tute emaw mana a hmel hmuh kher ngiata police station-a punkhawm duhna rilru kan thlah hleithei lo hi kalsan theih ni tawh se a duhawm hle mai a, police leh roreltute kut a thlen hnu pawha mipuiin inrawlh zel kan tum hian thil a buai zo ṭhin. Thil sual titute hi keimahni ngaihdan ṭheuha an chunga rorel kan tum zel chuan a fel thei lo a, misual ber nia kan ngaihte pawh hi danin a thil tihsual anga a hrem mai hi a fel ber a, mipui inrawlh tum chuan thil a buai zo ṭhin.

Republic Venga thil thleng bik hi chu dah ṭha ta ila, he mi pawn lama misual chunga rorel tuma mipui inhawr khawm hi chu kalsan tawh ila, dan anga thil kalpui tluka ṭha leh him a awm lo tih hre thar zel ila, mipui pungkhawmin rorel kan tum zel chuan a tuartu chu Mizote bawk hi kan la ni thei tih i hre thar zel ang u.