Grape chingtute hmakhua

Champhai Grape Growers Society nena thawk dun Radiant Company, Guwahati-te chuan tun hnai khan Champhai winery aṭangin grape tui litre 15000 an lei a, grape tui hi litre khat Rs. 65 zelin an lei. Tun ṭum hi a Radiant company ten Champhai aṭanga grape tui an lak vawi rukna a ni.

Champhai leh a chhehvel khaw ṭhenkhatah grape hi uar taka chin a ni a, chhungkaw tam tak eizawnna a ni. Mizoram sorkarin grape tui zawrh a phalsak a, a hralh pawh a kal hle a, grape chingtute tan pawh eizawnna ṭha tak innghah ngamna tling a ni hman. Tun hnaiah erawh chhan hrang hrang avangin grape chingtute'n an grape tui an hralh ṭha lo a, chhungkaw tam tak chu an buai mek a ni.

Heng grape chingtute hian eizawnna dang kalsanin grape chin an thlang a, a hlawk dawn leh a rintlak dawna an hriat avangin helam hi an hawi a ni. Nimahsela tun hnaia grape tui hralh a lo harsa ta hian an eizawnnaah thui takin nghawng a nei a, hei hi sorkar hian hriatsakin ṭan lakpui se a ṭha khawp mai.

Zep thu a cheng lo a, grape tui hralh a kal chhan lian tak kha chu zu ang deuha in an tam vang a ni. Tunah erawh sorkarin MLPC Act hmangin zu a zuar tawh a, hei hian grape tui hralh kawngah ngawng a nei ta niin a lang.

Grape tui hi a hralhna tur lam dap taima deuh se, tun aia zau zawkin a hralhna hi zawng se hralh theih loh tur thu a awm lo a, hei hi sorkar inrawlhna tur a ni ang. Guwahati lama hmunpui neite'n an leisak thei ang hian India ram hmun zau zawkah grape tui lei duhtu hi dap chhuah ni se, Mizorama kuthnathawka grape chingtute hian an thawhrim rah an tel theihna turin grape tui leisaktu tur hi sorkar hian zawng rawh se.