Sorkar sum enkawl
Food, Civil Supplies & Consumer Affairs (FCS&CA) department chuan above poverty line (APL) buhfai, a man toin an hralh chhuak ṭan a; APL buhfai man hi kg khat Rs. 9:30 ni ṭhin chu Rs. 15 ah tihsan a ni.
Buhfai man tihsan hian chhan a nei a, chu chu sorkar sum harsat vang a ni. Sorkar sum harsat hian chhan a nei a, chu chu inthlan dawna tlin duh luat avanga political party tinin sorkar hnathawkte hlawh tihsan an tiam vang a ni a, sorkar sum enkawl thiam tawk loh vangte pawh a ni tel bawk ang. Mizoram budget kan neih hi sorkar hnathawkin an hlawh tur an lak chuan a bang a tlem tawh hle a, hei hi thiam taka enkawl pawhin sum indaih lohna hi chu a awm zel dawn.
Sorkarin sum tam tak chawi belha buhfai a sem ṭhin chu titawpin buhfai man sang zawkin a zuar dawn ta a, tun hmaa mipui chhawk zangkhai tuma a lo tih tawh avangin buhfai man sang ta nia langah hian sorkar hi mipuiin an dem ngei ang. Buhfai man tihto hi sorkar sum dinhmun siam ṭhatna tur a nih chuan a ṭha tho a; nimahsela mipuiin an hmuh ve reng ṭhin chu thil danga sorkar sum hman dante hi a ni a, hriatthiam harsa an ti ngei ang.
Thil man thiam chin chuan sorkar sum hi hmanna tur duan bika pek chhuah a nih dan te, thil danga sum indaih loh vang maia sorkar sum pawh theih a nih loh dante pawh an hre mai thei a; nimahsela mipui nawlpui chuan 'buhfai man an tisang' tih chin bak hi an hre dawn lo a, sorkar an dem lo thei lo ang.
Sorkar hian mipui lakah hmai phihfai a duh a, man toa buhfai leitute tihlungawi a duh a nih chuan sorkar sum dangte hi uluk leh dik zawkin hmang se; sum bothlau awm reng mai leh hnathawh chhe tak hmuh reng te, political party worker invuh thau lian tual tualte hi a man toa buhfai leitute tan thil hmuh hrehawm tak a ni ang a, thin tiurtu a ni thei hial ang.
Sorkar hian a dinhmun hre rengin buhfai man hi a tito ta a ni a, mipui thin na tidam tura a sum neih dangte hi a enkawl thiam leh si lo a nih chuan mipuite hian 'buhfai man titotu' tiin an hre reng tawh dawn a; hnathawh ṭha zawk leh sum enkawl dan felfai zawk mipuiin an hmuh phahna a nih loh chuan an sawi rei hle ang tih a rin theih.