Parking mumal lo chinfel dan

Aizawl khawpuia sorkar leh corporate office 49-in lirthei hûnna tur motor parking an nei lo a, parking nei ṭha tâwk chu office pakua chiah an awm niin Aizawl Traffic Police-te chuan an chhinchhiah.

Sorkar office-te ber pawhin lirthei hûnna an neih lohna khawpui a nih vangin Aizawl khawpuia traffic jam a nasa hi thil mak a ni lo a; nimahsela thinrima phun ringawt hian awmzia neih loh avangin a chinfel dan zawn a ngai a, lirthei hunna mumal lo hi khawng taka chinfel tum a hun ta.

Tun hnaiah Aizawl veng ṭhen­khatin an veng huam chhungah zana lirthei riah an khap a, an han khap takah chuan tun hma zawnga kawngpui kama lirthei hung ṭhinte pawhin lirthei dahna an zawng hmu ve zel mai a, theih loh nia lang ṭhin kawngpui kama lirthei hun khap chu a hlawhtling thei ta. Hei hian sorkar lam pawh hi ṭan laktir se, an office kawta lirthei hunna a awm loh chuan lirthei hunna hi ngaihtuah chawp ve mai se, chêp leh rem lo taka sorkar lirthei hûn hi tihtawp ni rawh se.

Dan hmanga khauh taka kal mai loh chu Aizawlah hian traffic jam tihreh dan kawng awmze nei tak hi a awm ta meuh lo a, a number mila lirthei in tlanchhawk kan duh a nih loh phei chuan traffic jamah kan hun hlu tak kan khawhral kumkhua tawh dawn a ang hle. Tun dinhmuna traffic jam ṭhenkhat tiziaawm thei chu kawngpui kama lirthei hunna tihtlem a ni a; harsa deuh dawnin lang mah se lirthei hun tihtlem a nih phawt chuan traffic jam a ziaawm hret thei ang.

Motor parking a awm loh na na na chuan lirthei ken chhuah pawh kan insûm phah deuh mai thei a, tunah hi chuan rem vak lo chung pawhin a hun theihna tawk kan hmu zel a, sorkar pisa bulte phei chu rem leh rem loa lirthei dah khawmna ang mai a chang zo ta. Thuneitu lam hian sorkar pisa a nih leh nih loh thliar lo hian, kawngpui atan hnawksak tura lirthei dahna zawng hi titawp se, huaisen leh khauh taka an kal chuan lirthei hunna tur chu kawngpuiah ni lo an zawng hmu ve mai ang.