Khualliana ṭan leh insâwm

December 8, 2024-a Mizoram sorkar thar lak luh a nih kan Chief Minister chuan Raj Bhavan Durbar Hall-ah press conference a nei nghal a, "Chief guest-ah ṭan zut kan tum lo, thil tênau thlenga chief guest-ah min sâwm lo turin mipui pawh kan nge che u a ni," tiin, a kaihhruai sorkara hotute chu khuallianah ṭan tam loh an tum thu a sawi.

Chief Minister-in khualliana ṭan zut an tum loh thu a sawi hi a lawmawm a, a theih chin china an tihhlawhtlin tur pawh a ni. CM-in a lo sawi tawh hi CM leh minister-te hian thla sarih chhung vel thuneihna an chelh tawh chhung hian an zâwm ṭha em? Ṭhenkhat chu khuallianah an lo ṭang ngun mah mah tawh zawk pawh a ni thei a, inenfiah a ṭul ang.

Pawl, a bikin NGO-te'n an hun hmanpui tura sâwm apianga lo 'aw' zel loh a ṭha. Minister-te hi thil pawimawh tak takah an pisa lama hmu duh tam tak an awm a, minister-te hian an lo dawngsawng sêng lo tlangpui àwm e. An enkawl department thilah tih tur leh enfel tur tam tak an nei bawk. Chutih laia an hun tam tak la hêk zawnga khuallian/khualzahawma ṭan tam loh theih a ṭha ang.

Minister-te hi politician an ni a, mipui leh pawl tihlawm tum emaw, tihlunghnûr duh lo an ni tlangpui. Mipui leh pawl aṭanga khuallian/khualzahawm ni tura sâwmna a awm chuan hnar zel a harsatna chen pawh a awm thei ang. Mipui leh pawlte kan insûm a ngai a, minister tel kher loa hun hman kan tum a ṭul. Minister-te hi an buai em em a ni tih hria ila, minister phût kher loh nacháng kan hriat a ṭul a ni.

Khualliana ṭan tam loh tur thu CM-in a sawi hi CM leh minister-te hian a theih chin chinah an zawm a ngai. CM-in a lo sawi tawh hi awlsam taka en lêt theih a ni. Rorelna an chan tirh phata hotupa berin a lo sawi tawh a ni a, sâwmna nazawng pawm loh a, hnar ngam a ṭul. Mahni inthiam chawp emaw, sawi mâm emaw ngai lo turin an invên hmasak a ngai.

Chutih rualin, loh theih loha khualliana ṭan a ngaihna, âwm ngawih ngawih erawh a awm ve bawk tih erawh kan hriat tlan a ṭul bawk ang.