NLUP hêk thu

Chief minister Lal Than­hawla chuan, mi ṭhen­khatin Central-ah NLUP an hêk avangin Central-in Mizoram sorkar chu NLUP chungchang sawifiah turin a ti niin a sawi a; NLUP chu an kalpui zel tur thu a sawi.

NLUP hian sawi a hlawh zing ta hle mai a, a thawm a na a, a hnathawh a lian tham a, a sum che vel pawh a tam tham a, kan la sawi dawn chauh pawh a ni mai thei. He Congress flagship programme hian kawng hrang hrangin nghawng a nei chho mek a, a ṭha zawnga hnathawh pawh hmuh tur a awm ang a, a ṭha lo lamte pawh a awm ngei ang. Engpawhnise chief minister berin NLUP kalpui dan hêk a nih thu Zoram pum hriata a puang ta mai hian ngaihtuah a tithui hle mai.

Central-ah sorkarna chelhtu a inthlak a, tun hma zawnga Central lama tlatlum ṭhin zawk an tlatlum ta lo a, hei hi remchanga hmangin Mizorama Congress party thil kalpui hi an hêk ringawt a nih chuan thil fel lo tak a ni ang. Tute hnathawh emaw sawisel tum ngawr ngawr leh a chhiatna lai chauh zawnga politics-a inbeihna a nih phei chuan a huatthlala hle ang. Chutiang ni loa NLUP kalpui danah thil fel lo a awm tak tak a, an sum hman dan a felhlel a, sorkar sum political party hamṭhatna tur hawizawnga an hmang a nih chuan hêk an lo nih pawhin thil mak tak a ni hran lo ang.

NLUP hi hêk theih loh a ni lo a, an hêk avang hian tihtawp a ni nghal kher lo ang. Hêk avanga tihtawp theih a lo nih phei chuan Prime Minister-in a bika a pek anga sawi kha a rinhlelhawm rum rum dawn a; a ṭha kan ti emaw ti lo emaw, NLUP hi bul ṭan a nih tawh avangin kawng chanveah hi chuan nam lum lo hram se a ṭhat zawk hmel.

NLUP hêktu an awm thu chiah kan hria pawh hi mipuiin an rilruah zawhna an neih phah a, a hêktute hi tute nge an nih tih sawi chhuah law law ni se a ṭha a; engpawhnise NLUP hi an lo sem chhunzawm thei ta lo palh a nih chuan, 'tute emaw hêk vang' tia puh a remchang dawn hle mai!