Social media leh Mizote

Home minister R Lalzirliana chuan, Mizoramah social media hman khawlohna a hluar chu pawi a tih takzet thu sawiin, "Social media hmangsualte hi dan hmanga na taka hrem theih an ni," a ti a; tun hnaiah mi ṭhenkhatin midangte tana pawi tur a nih leh ni loh leh, dan bawhchhiatna a nih leh nih loh pawh ngaihtuah loin thil thleng danglam hlek kan hriat apiang a dik leh dik loh pawh fiah hman lohin kan vawrh darh ṭhin niin a sawi.

Tunlai Mizoram boruaka mipui tichiaitu ber pakhat chu social media a ni a, inbiak pawhna ṭha kan neih kan hman thiam loh avangin mipui an thlabar a, ṭul loah mi tam tak an chiai phah a ni. Thil hre chiang loa vawrh darh a hluar mai a ni lo a, thil phuahchawp ngialngan pawh fiamthu ang deuha vawrh darh ching an awm a, a dawngsawngtu lamin thutak thehdarha an thehdarh zui avangin mipui an tiphawlhlek hle a ni.

Heng thil thlengte hi Mizo kan sual bik vang emaw, kan ât bik viau vang emawa puh ngawt chi a ni lo a, thiamna sang takin min luhchilh thut avangin kan inpeih hman lo a, kan buai ta ni berin a lang. Hman ni lawkah mobile phone kan nei ṭan a, tunah mobile phone handset ṭha ber kan kutah ngei kan hûm fur tawh a, internet connectin thlun zawm a ni tawh bawk nen, a hman dan turah inzirtirna ṭha kan neih loh avangin kan buai mek niin a lang.

Chhiattawk an awma an thlalak rapthlak tak thehdarh vak maite hi khawvel hmun dangah pawh thil thleng ngai lo a ni bik hauh lo a; nimahsela mipui nawlpuiin an hmuh tura darh chiam mai hi chu a zialo takzet a, dan bawhchhiatna a ni bawk. A tirah tuten emaw hriat loh vanga an lo thehdarh a nih pawhin a tawpna ni tawh se, tun hnaia kan buaina hian rah ṭha chhuah se, kan thil tihsual hi inzirnaah hmang ila a ṭha khawp mai.

Mahni kut ṭheuha hnam pum nghawng theia thil thehdarh theihna kan ken tawh avang hian mipui nawlpui inzirtirna hi tun aia uara kalpui a ngai a, sorkar, khawtlang hruaitute leh kohhran hial pawhin inzirtirna lam hi uar zawkin kalpui se, rei loteah kan inzirtir thiam vatin a rinawm a; social media chungchang hi tun aia uara zirtirna kalpui a ngai takzet a ni.