Thlai thar zawrhna

Aizawl DC chuan February 1, 2015 aṭanga hman ṭan tur thupek chhuahin, Aizawl khawpuia kawngpui dung ṭhenkhata inzawrh phal lohna hmunte an tarlang a, heng hmunte hi chawhmeh zuarte inzawrhna ṭhin deuh vek a ni.

Mizoram khawpui ber Aizawl hi a kum telin mipui an pung chak a, lirthei leh chênna inte a pung zel a; nimahsela mipui nitin mamawh thlai thar zawrhna erawh a pung ve lo. He khawpui hi ruahmanna fel tak nena din a nih loh avangin mipui mamawh thil tam tak siam tel loh a awm a, chung zinga langsar ber pakhat chu thlai thar zawrhna hmun mumal lo hi a ni.

Tun hma deuh aṭang tawhin kawngpui kam ni si, thlai thar zawrh maina hmun eng emaw zat a awm a, hengte hi tun thlenga hman zuite a la ni hlawm. Tun hma anga kawngpui hrula bazar hi thil remchang tawh lo ni mah se, kan tih ṭhat tawh avanga bazar hmun sawn hleih theih lohte a awm a, a buaithlak hle. Tun hma chuan lirthei leh mipui an la tlem a; lirthei leh mipui pun hnua kawngpui kama la inzawrh zel hi chu tuihtawp theih ni se a ṭha khawp mai.

Hetihlai hian sorkar lam tan hei hi chonaah ngaih ni se, thlai thar zawrhna hmun mumal tak buatsaih hi a hun tawh khawp mai. Mipuiin an kal ṭhanna hmun an pan lo thei lo a nih pawhin, vantlang hmuna inzawrh tal hi chu khap thei se, hmun danga an inzawrhna tur buatsaih hi sorkar mawhphurhna a ni. Hmun awm lo hi sorkar tan chhuanlam a tling lo a, mamawhna a san chuan mimal hmun pawh a lei mai tur a ni a; bazar hmun nghet anga kawngpui kam hman mai hi a hnawksakin hriselna atan pawh a ṭha lo hle a ni.

Tuna inzawrh phal tawh lohna hmuna inzuar ṭhinte hi mi harsa zawkte an ni hlawm a, chu vanga dan bawhchhiattir reng theih erawh a ni hauh lo. Mizoram sorkar hian thlai thar zawrhna tam zawk hi Aizawl khawpuiah hian buatsaih se, kawngpui kama inzawrh hi tihtawp theih ni se duhthusam a ni e.