Pisa kai hun vawn dik thar a ṭul

Sorkar term kal meka hotute'n thuneihna an chan tirh khan sorkar hnathawkte chu pisa hun chhung (office hour) ṭha taka vawng turin an chah a, attendance lakna atan pisa tinah biometric enrolment dah tum a nih thute pawh an puang a; sorkar hnathawkte chu pisa ṭan hunah thleng a, bàn hun pangngaiah báng tura hriattir an ni.

Hun kal tawhahte sorkar hnathawk zinga tam takin pisa kai hun chhung an vawng dik lo hle ṭhin a, pisa ṭan hun pelh hnu darkar khat leh a aia tama pisa thleng chauh ṭhin te, pisa bàn hun hmaa báng ta mai an tam hle. Chu chu mi tam takin an vei a, mahse, thuneitu sang lam aṭangin vei tak takna a awm lo nge ni, an liam mai mai a, pisa kai hun dik taka vawn a nih theih nan khauh taka hmalakna a awm meuh lo.

Sorkar thara hotute duh dan hi department leh pisaa hotute bakah thawktute'n an zâwm ṭha zui viau niin a lang a, tun hmaa pisa kal tlai tak tak ṭhinte pawh an che chhuak hma ta deuh. Mahse, tun hnaiah hian an inthladah leh ta deuh em ni, tia ngaih theih turin kal tlai leh haw hma an tam leh tial tial niin a lang. Thuneitute'n an en zui a, ṭan an lak thar a, pisaah inthununna an kenkawh ṭhat a ṭul.

Pisa kai hun chungchanga sorkar hotute duh dan hi dan leh thupek awm sa a ni a, thuneitu sang zawkte'n an sawi nawn fo kher loh pawha zawm mai tur a ni. Sorkar hotute duh dan hi department/office hotute pawhin an thlàwp ṭhat a ṭul a, an department/pisa ṭheuhah ṭha taka an kenkawh a ngai; a tuate pawh inthlahdah a thiang lo.

Pisa kai hun dik taka vawn hi sorkar hnathawk zawng zawng mawh a ni a, Pathian ringtute phei chuan zawm ngei tur a ni. Pisa kai hun laia hna kaihhnawih ni si loa chhuahna tur mimal pawimawh neih tam loh a ṭha. Thuneitute'n inthununna khauh taka an kenkawh vang ni kher lo pawhin Pathian ringtu, thuawih tur leh Isua zirtirna anga awm tur kan nihna te, kan chhia leh ṭha hriatna hmangtein pisa kai hun dik taka vawn hi mi tin tih tur a ni.

Hotute'n pisaah inthununna ṭha taka an kenkawh avangin mi ṭhenkhat chuan mi hriatthiamna nei loahte an puh mai ṭhin; a zialo hle. Pisaah inthununna ṭha taka kenkawh vanga hotute ning mai ṭhin leh sawisel ṭhin kan nih chuan kan inenfiah hle a ngai tihna a ni.