Tunlai Mizoram khawvel

Tun hnaiah Mizoram sorkar chuan chhiah chi hrang hrang man tihsan chu a takin a kalpui ṭan a, buhfai man a toin a hralh ṭan bawk. Hengte hi eptu lam chuan ṭha an ti lo a, lungawi lohna lantir an tum mek.

Mizoram sorkarin sum leh paia buaina a tawh mek hi tun hnai thil mai a ni lo tih sorkar hotuten an sawi hi thil a dik a, tun hma deuh aṭanga inṭan a ni. Hetihlai hian tuna sorkarna chelhtute hian thuneihna an chan hnuah an siam ṭha ta nge an tihbuai belh zel tih zawhna a lo piang nghal vat a, tun thleng hi chuan sorkar sum leh pai harsatna hian ziaawm lam a la pan thei lo chu a nih hi.

Political party tinin inthlan dawnah sorkar hnathawkte hlawh sang zawk pek an tiam vek a, hei hi buaina bul lian tak pakhat a ni. Tun hmaa kan harsatna tawhte kha sorkar hnathawkte hlawh tihsan hmaa awm tawh a ni a, a siam ṭha theitu berin sum leh pai dinhmun hre chungin sorkar hnathawkte hlawh a tipung ta a, a bang a tlem tawh em avangin state sum leh pai dinhmun a chhe ta a ni.

Mipui hriatthiam loh zawng tak tura sorkar thuneitu lamin lirthei an lei tharte pawh hi buaina belhchhahtu pakhatah a chang zo ta a, an lirthei leina sum hi state sorkar sum tibuai tham ni kher lo mah se, thil danga sum harsatzia sawi chunga anmahni chuanna tur lirthei man to an lei hi mipuiin sorkar an dem zual phah chhan niin a lang.

Tunah chuan sor­karin sum dinhmun siam ṭhat tumin kawng chi hrang hrangin ruahmanna thar a siam a, hengte hi tunah sawisel la hlawh deuh mah se, nakinah kan ramin a ṭhatpui dawn chuan fak a la hlawh lêt ve mai thei a; nimahsela tun dinhmunah chuan sorkarin mipui kaltlanga sum hmuh lêt a tum dan hi mipui nawlpui hi chuan an la pawm thiam lo hle niin a lang.