Mizoram - Assam ramri buai hi

Buhchangphai Ramthar Zaua Mizo leilet enkawltute chu tun hnai khan Assam Police leh Forest department-a thawktuten an kal chilh a, thlámte chu ṭhiat turin an hriattir a; hei vang hian Mizoram sorkar chuan IR police-te a tir nghal a ni.

Mizoram leh Assam hian ramri buaina an nei rei tawh hle mai a, a reh mai dawnin a lang lo. Tun hnaia buaina chhuak leh hian eng chen nge nghawng a neih dawn hriat a ni lo a, ramri-a buaina chhuak fo hian mipui a tibuai hle a ni.

Khawvel ram leh ram inkarah pawh ramri buai hi a awm ṭhin a, hetiang buainaah hi chuan thiam zawka inngai ve ve an ni ṭhin. Ram pakhat chhungah pawh ramri buai hi a la awm zel a, India ram state-te pawh ramri buai vangin nasa takin an lo innghirngho tawh ṭhin. Assam hian kil tinah ramri buai a nei emaw tih mai tur a ni a, a

ṭhenawm state-te nen an intibuai fo tawh a, thisen pawh a lo chhuak hial tawh a ni.

Tun hnaia Buhchangphai Ramthar Zaua thil thleng hi Mizote tan chuan a huatthlala takzet a, Assam Police leh an Forest department-a hnathawktute'n an kal chilh mai hian Mizo mipui chu a barakhaih hle ang. Helai hmun hi Mizoram lam chuan kan ram chhung angin kan ngai nghet tlat a, Assam pawh hian an ram chhung nia an ngaih vangin an rawn che a ni ber a, he buaina hi chinfel vat a ngai.

Ramri buai hi tun hmain silai leh tharum thawh hmanga chinfel tum a ni tawh ṭhin a, hei hi buaina chinfelna hmanraw ṭha ber a ni hauh lo tih chu khawvel history-ah kan hmu. Tun hnaia Assam leh Mizoram ramria buaina awm pawh hi police intirh tawna chinfel mai hi a tawk lo a, thuneitu sangin ngaimawh se, sorkar hruaitu sang chinah inbiakna neih ngei a ṭul takzet a ni.