Ram tihkan leh NLUP
Fire Prevention Week hawnnaa thusawitu, chief minister Lal Thanhawla chuan, Mizoram chu India hmarchhaka ram tikâng nasa ber nia hriat a nih thu a sawi a, "Forest Survey of India chhût danin kum tin Mizoramah sq. km. 980 vel ram a kâng ṭhin a, India hmarchhakah ram tikâng nasa bera hriat kan ni. Tunlai khawvel changkang tawhah chuan a zahthlak hle," a ti.
Thing phun belh tura ṭan lain Green Mizoram tihte kan kalpui a, chutihlaia ram tikang nasa la nih hi thil inhmeh lo tak a ni. Ram kan tihkan chhan hi kan lo neih danin a zir loh vang a ni a, pi leh pute hunlai aṭanga kan lo chin ṭhan tawh lo neih dan hi kan la kalsan thei rih si lo a, Mizoram hi a la kang zel dawn a nih hmel a, a pawi takzet a ni.
Mizoram ram kan chhan tihtawpna remchang hnai tak chu New Land Use Policy (NLUP) hi a ni a, a hming nen pawh a inhmeh hle. Kan lo neih dan thlaka kan ram neihte ṭangkai zawka hman dan thar lam a kâwk a, NLUP kan kalpui hnu pawha ram kan la tikang zel a nih chuan a tihtawp dan dang zawn a huphurhawm tawh hle. Kan ram neihte kan hman dan thlak a, ṭangkai zawka kan hman theihna turin sorkarin sum leh pai leh hmanruate a thlawnin min pe a, chu chuan kan lo neih dan a la tidanglam phak lo a nih si chuan, ram hi kan la tikang zel dawn a nih hmel hle.
Mizo rilrua lo vah leh hal phawt loa buh leh thlai thar thei lo tura inngaihna hi thlak a hun. Khawvelah tlang ram tam tak a awm a, kan sik leh sa ang tho nei kan chhehvel state-ahte pawh lo hal kher loin buh leh thlai an ching thei. Lo hal ṭhin hnam hi awm ve bawk mah se, keini ang taka nasaa hal hi an ni ve lem lo a, chuvangin lo kal kher loa tlang ram lo neih inzirtir thiam hi a hun tawh hle a ni.
Sorkar hian ram kang tihrehna hmanruaah NLUP-te hi ṭangkai takin hmang thei se duhthusam a ni a, 'New Land Use Policy' tih a nih ang ngei hian kan ram leilung kan hman dante hi thlak thei se a ṭha hle. Ram kang venna tur dik tak chu kan lo neih dan thlak hi a nih hmel a, hei hi kan tum ngam lo a nih chuan Mizoram hi a la kan belh zel dawn niin a lang a, a pawi hle a ni.