Lokayukta thuam chak a ṭul

Congress party chuan Mizoram sorkar chu Lokayukta kut phuarah leh a dinhmun tihniamah ngaiin July 11, 2024 khan Lokayukta kut phuarna phelh tura ngenna Chief Minister's Office-ah an thehlut. Lokayukta kalpui dana an hmuh dante press mite hmaah an puang bawk.

Congress hruaitute sawi danin, The Mizoram Lokayukta (Amendment) Act, 2024 pawm a ni a, March 15, 2024-ah Mizoram Gazatte notification chhuah a ni. Dan siamṭhat chu Lokayukta tihchak leh thuam ṭhat lam hawi loin, hna thawk tak tak thei lo tura siamnaah an ngai a ni.

Lokayukta dan tihdanglam a nih dan eptu party pakhatin an hmuh dan leh ngaihdan hi a dikna lai a awm a, ngaihdan àwm tak pawh a ni. Chutih rualin, dan tihdanglam a nih dan leh a chhante sawifiahtu awm ta se, a àwm leh viau mai thei bawk. Ngaihdan inang lo awm theihna a ni a; awmna party azirin kan ngaihdan a danglam thei ang.

Congress party-in an sawi hi a dik emaw, dik lo emaw, a pawimawh ber chu - Lokayukta kan nei ta rau rau, hna thawk theia siam a, a nih dan tur ang taka a kal theihna tura thuam a ni.

Mizoram Lokayukta hi kum eng emaw ti chhung a kal ve tawh a, mahse, tun thlengin an nih tur ang a la ni thei lo. Investigation Wing a la nei lo a, chuvang chuan anmahni'n an duh angin thil an chhui thei lo a, mi dang (police/ACB) chhuitir zel a la ngaia sawi a ni. Hotu mai bakah, thawktu hrang hrang an la indaih lo hlea sawi a ni a, harsatna dang neuh neuh pawh an neia sawi a ni.

Tuna sorkarna chelh mektu party MLA-te hi eiru lo tura intiam an ni a, eirûkna tihtawp an tum thu an tlangaupui nasa bawk. Lokayukta hi eirûkna dona hmanraw ṭha ber pawla ngaih a ni. Sorkar hian eirûkna donaa a hmanraw ṭha ber tur pakhat Lokayukta hi a thuam chak a, hna thawk tak tak theia a siam vat a ngai e.