Sorkar ram humhalh

School Education Department Land and Building Protection Committee chuan, tun hnaiah Chhiahtlang Middle School ram chu department lam thuneitute be rawn hmasa loin vantlang tana sahthlak tumna a awm niin an sawi a, hei hi sût a nih loh chuan Mizoram pum huapa zirna inte khara lungawi lohna lantir an tintuah.

Mizoram sorkar department-a ram nei ṭha ber chu School Education department hi an ni mai thei a, chutih rual chuan anni tho hi vantlang leh sorkar department dangin ram an chhuhsak tam ber an nih hmel. Khaw tinin sikul an nei deuh vek a, a khaw neitu lamin sikul hmun tur a nih avangin hmun rem leh ṭhalai an lo pe deuh zel a; tun hnaia khawvel ṭhang zelah heng hmunhma ṭhalai tak hi hlelh thlak duhna a lian deuh deuh zel.

Sorkar ram hian humhalhtu a neih loh chuan thiltithei deuh tute'n emaw vantlang chakna hmangin an hlep thla zel dawn a ang a, chu chu tunah pawh kan tawng mek. Bialtu MLA-in emaw, sorkara thuneitu sang tuin emaw a chakna leh thuneihna hmanga a bial mipuite tihlawm duh vanga sorkar hmun pawimawh vantlang tana a pek lêt hi sawi tur a awm zauh zauh. Heng huna sorkar ram humhalh duh bertute chu a department-a hnathawktute an ni a, chutihlaiin sorkar lama hotu liante hi chu hun rei lote chhung roreltu mai an nih avangin department lam aiin an bial mipuite emaw, khaw­tlang mipui ṭang­rual emaw an dah pawimawh zawk ṭhin.

Hetihlai hian sorkar ram a nih vanga tawngpawng ui chiam pawh hi thil fing ber a ni lo ve thei a, an hman lehna turin a zir phawt chuan ram sahthlak hi ui tur chi a ni lo ang. Tun hma deuha ram ṭha lo nei tawhte'n a hmanna ṭha zawk atan an pe phal a nih chuan ram tana thil ṭha tho a ni a, inhawng zu taka hmalam thlir chunga inrawntlan a ṭha ang.

Mizoram leh a khaw mipuite tana ṭangkai zawka hman tur a nih chuan sorkar ram sahthlak hi thil uiawm a ni lo a, tute emaw politics-a hamṭhat zawnna mai a nih erawh chuan thil fel lo a ni ang. Sorkar ram hian humhalhtu a mamawh a, sorkar hnathawkte'n an ram humhalh duhna thinlung an pu hi thil lawmawm tak a ni.