CM leh Secretary-te inkawmna thu

Chief minister chuan tun hnai khan Mizoram sorkara Secretary-te meeting a neihpui a, sorkar laipui lamin Mizoram chu hna thawk chak lo an ti ṭhin tih a sawi a, thil ṭul bik ni loa zin chhuak vak vak lo turin a chah a, project thawh mekte vil ngun turin a chah bawk.

Chief Minister-in sorkar hotu pawi­mawh chinte bulah a sawi hi ngun taka ngaihtuah zui chi a ni a, ram hruaitu lu berin a mi pawimawhte hmaa a sawi hi chu a ngaih pawimawh tlak a nih hmel a, Secretary lam pawhin an bawhzui ngei a ṭhat hmel. Mizoram sorkar hnathawh a muang tia sorkar laipui lamin an lo sawi ṭhin thu Chief Minister-in a sawi chhuah hi thil serious tak a ni a, min chawmtu lamin hnathawk chak lo anga min hmu a nih chuan insiamṭhat a ngai hle.

Sorkar laipui dawr tura zin chhuah tam loh deuh ṭha a tih thu Chief Minister sawi pawh hi thil dik tak a ni thei a, Mizoram sorkar aiawh New Delhi-ah an awm reng a, anni lamin an tihsak theih chinah hi chuan zin chhuah kher loh hian sum leh pai tam tak a khawl phah theih a, chumi piah lamah Mizoram lama an hnain a tuar lo. Hetihlai hian officer

ṭhenkhat ṭul mang loa zin chhuak tam lutukte pawh an awmin a lang ṭhin a, hengte hi sorkar hian kalphung fel deuh zawk neiin zin ṭulna/ theihna chinte pawh hi siam se a ṭhat a rinawm.

Project leh scheme hrang hrangte vil ngun tura Chief Minister-in a chah hi ngaih pawimawh ngai tak mai thil a ni reng a, Mizoramah hian project vil uluk leh uluk loh inthlauhzia a takin kan hmu chho mek zel a ni. Khawi aṭangin emaw project lian tham tak mai kan nei a, a project neih dawna kan phûr nen a vil zui lamah hian kan ṭuan a muang fo a, hei hi ṭan lak thar a ṭulna lai a ni.

Ramin hma a sawn dawn chuan thuneitu lamin an zir hmasak a ngai a, hruaitu bawrin thil tih an duh tak tak hi chu a hlawhtling tlangpui. CM pawh hian Secretary-te a fuihna leh thuchahte hi amah ngei pawhin vil ngun se, Secretary rualin hnathawh an duh tak taka an tum a nih chuan Mizoram hian hma a sawn thei ngei ang.