Ramri chinfel ngam a ngai ta

Buhchangphai Ramthar Zaua Mizoram leh Assam ram inchuhna hmun chu tun hnai khan YMA hruaituten an tlawh a, Mizoram chhung ngei a ni tih lantirna turin YMA flag an zár.

Helai hmun leh a chhehvel hi hun eng emaw chen chu hmun inchuh a ni tawh a, Mizoramin inti tatu viau mah ila Assam lamin an ramri chhungah an ngai nghet ve tlat mai a, a khat tawkin Assam police-te leh Assam Forest department-a hnathawktute lo kalin Mizo leilet siamtute tan harsatna an thlen ṭhin. He hmun hi Mizoram Home Minister-in a tlawh tawh a, tun hnaiah bialtu MLA pawh mipui thlavang hauhin a kal a, YMA hruaitu lamte pawh an kal.

Ramri buai chinfel dan ṭha ber chun thuneitute inbiak hi a ni a, a hmun tlawh leh ringawt hi chu buaina chinfelna hmanraw ṭha ber a ni lo palh thei. Kan inchuhpuite awm lohlaia ramri buaina hmun tlawh a, kan ram a nihzia lantir hi thil ṭha tak a nihna lai a awm a, mipuite thlamuan tura feh chhuah hi thil ṭangkai tak a ni reng a; nimahsela buaina chinfelna erawh a la tling lo kher lo ang.

Hetiang thilah hi chuan district level-a sorkar hotute inbiaa chinfel tum mai hi a tawk zo lo a, hun rei tak chu Cachar district chhunga sorkar thuneitute nen indawra chinfel tum a lo ni tawh ṭhin a, tun hi kan thlen chin chu a ni. Kan Home Minister hial pawh a hmunah kalin mipuite thlavang a lo hauh tawh a, a ke pênna lam hi thlakin Assam Home Minister-te dawrin thil awmzia sawipui ta se a hlawk leh zual ang em?

Chief Minister level-a sawi ṭula kan la ngai lo pawh a ni mai thei a; nimahsela a hmuna thil awm dan thlirin boruak ṭha lo zawk chawk chhuaktu a ni ve palh thei a, chuvangin Mizoram leh Assam ramri buai neih hi chingfel tura ṭan lak ngam a hun tawh a, sorkar thuneitu lu lam an chet a hun tawh lo maw?