Ram ni pawimawh ngaih pawimawh

India Republic Day chu ram pumah hman a ni a, Mizoramah pawh he ni hi hman niin Aizawla a hun pui berah sorkar official-te an kal ṭha thawkhat hle.

Kum eng emaw zat chu Mizoramah hian India ram ni pawimawh hian ngaih pawimawh a hlawh ta vak lo emaw tih tur a ni a, sorkar mi pawimawh ngei ngei pawh ni pawimawha kal loh mai ching an tam hle. Sorkar thuneitu lamin ṭan an la a, kum dang aia na deuh zawka innawr a nih vang pawh a ni ang, kumin Republic Day chu Lammualah official kal an ṭha thawkhat.

Sorkar hnathawk ni si, ram ni pawi­mawh ngaih pawi­mawh nachang hre lo an awm ṭhin hi thil inhmeh lo tak a ni a, hei hian Mizoram sorkar inawp dan fel lo tak a lantir niin a ngaih theih. Tun hma kha chuan Mizoramah sorkar hnathawkte invawn dan a felin discipline pawh an lekkawh ṭha zawk a, hun pawh an vawng dik zawk tlangpui.

Hei mai hi ni loin tun hma chuan sorkar hnathawkin a tihawm leh tihawm lote pawh fel taka thlir ṭhin a ni a, sorkar hnathawk an nih vanga an tel lohna âwmah chuan officer pawimawhte pawh an tel lo ngam mai a, an telna tur a nih chuan ṭha takin an tel mai ṭhin. Sorkar hnuaia hnathawk an nih an inhria a, sorkar thu an dah pawimawh ṭhin a; nimahsela tun hnaiah hian sorkar hnathawk ni si an tel lohna tura tel, an sawi tur ni lo vantlang hriata sawi leh an ziah tur ni lo ziakte thlengin an pung zel.

Sorkar hna­thawkte hian ram ni pawimawh ngaih pawimawh nachang hre thar se, hei hi sorkar inawp dan fel hnuaiah chuan thil thleng ngei ngei tur a ni. Sorkar mi pawimawhte berin hma an hruai chuan mipui hi chuan an hung an zui maiin a rinawm a, India rama cheng kan nih chuan India ni pawimawh ngaih pawimawh thiam hi kan mawhphurhna a ni.