Sorkar doctor leh NPA lak

Health & Family Welfare Department-a Under Secretary chuan HFW Principal Director hnenah July 10, 2024 lehkha thawnin, Mizoram sorkara thawk nghet doctor zinga private practise ti chunga Non Practice Allowance (NPA) late list a rang lama thehlut turin a ngen.

HFW Under Secretary lehkhaa subject-ah, ''Mizoram sorkar hnuaia doctor-te NPA pek chhunzawm tawh loh chungchang' tih ziah a nih a nih avangin Mizoram sorkarin a hnuaia thawk nghet doctor-te zinga private clinic nei emaw, private hospital-a thawk emawte'n NPA an lak tihtawp a tuma ngaih theih a ni.

Central Health Service Rules, 2014-a Rule 13-ah chuan sorkara thawk doctor-te tan private practice phal a nih loh thu a chuang a. Mizoram sorkarin February 17, 2010-a The Mizoram Gazette a tihchhuahah pawh Mizoram sorkara thawk doctor (Mizoram Health Service)-te tan private practice phal a ni lo a; private practice ti lote'n NPA an la thei tih tarlan a ni.

Mizoram sorkara thawk doctor zinga a tam ber chuan NPA an la niin a lang a, tun hnaia RTI Act tlawhchhana zawhna chhannaah pawh NPA late list tarlan a ni a; chu'ng zingah chuan private practice tite pawh an tel niin a lang.

Sorkar danah chuan MHS-a lut doctor-te'n private practice an ti thei lo hrim hrim a. Chutih laiin, private clinic an nei leh private hospital-a an thawk tel hi mipui tan a ṭangkai viau tho bawk si. Private practice an ti hi chu dan kalh ni mah se mipui mamawhna avangin sorkar hian hrethiam thei se; sorkar hna chauh thawk doctor-te'n NPA lain, private practice tite chuan NPA la lo ngam se a fuh berin a rinawm.

Doctor-te hi an pawimawh êm avang hian mipuiin langsar taka sawisel an hreh deuh niin a lang a, sorkar pawhin an lakah dan anga khauh taka kal a hreh ṭhin niin a lang. Hei tak hi sorkar doctor-te an inlulin phah a hlauhawm a; mi ṭhenkhat chuan an inluling tawhah an ngai tawh hial mai thei.

Sorkarin a hnuaia thawk doctor zinga private practice ti chunga NPA late an NPA lâk tihtawp a tum a nih chuan a ṭha a, mipui pawhin an thlâwp viauin a rinawm. A theih chen chenah dan anga kal theih a ṭha ber a, chu chu doctor-te pawhin an hriatthiam a ngai a ni.